२३ भदौ, विराटनगर ।
ललितपुरमा जारी एन्फा महिला लिगमा कोशी प्रदेशले आफ्नो जितको लय कायमै राखेको छ । आइतबार भएको खेलमा कर्णाली प्रदेशमाथि सानदार जित निकाल्दै कोशीले लय जारी राखेको हो ।
सातदोबाटोस्थित एन्फा कम्प्लेक्समा भएको खेलमा कोशीले कर्णाली प्रदेशलाई ४–० ले हराएको हो । यसअघि लिगको उद्घाटन खेलमा कोशीले स्याङ्जाको वालिङ नगरपालिलाई ४–० गोलले हराउँदा समीक्षा मगरले दुई गोल गरेकी थिइन् भने सन्जुमाया तामाङले एक गोल गर्दा वालिङकी यमकुमार विकले एक गोल उपहार दिएकी थिइन् ।
दोस्रो खेलमा कोशीले बागमती युवा क्लबलाई २–१ गोलले पराजित गरेको थियो । कोशीको जितमासमीक्षा मगरले एक गोल गर्दा एउटा आत्मघाती गोल उपहारमा पाएको थियो । तेस्रो खेलमा कोशीलाई जिताउन पूर्णीमा राईको दुई गोल गर्दा समीक्षा मगर र प्रतीक्षा राईले दुई गोल थपिन् । पूर्णीमाको गोलमार्फत कोशीले पहिलो हाफ १–० को अग्रता लिएको थियो ।
तर, ६७औं मिनेटमा समीक्षाले गोल गर्दै अग्रता २–० मा पुर्याइन् । समीक्षाको जारी लिगमा यो चौथो गोल हो । त्यसको पाँच मिनेटपछि नै पूर्णीमाले व्यक्तिग दोस्रो र टोलीका लागि तेस्रो गोल गरिन् । ७५औं मिनेटमा प्रतीक्षाले अर्को गोल थप्दै कोशीलाई सानदार जित दिलाइन् ।
यससँगै कोशी प्रदेशले लिगमा अपराजित यात्रालाई कायमै राखेको छ । शतप्रतिशत जित निकालेर शीर्ष स्थानमा रहेको कोशीले तीन खेलबाट नौ अंक पुर्याएको छ । यसभन्दा महिला लिगमा विराटनगर महानगरपालिकाको नामबाट खेल्ने गरेको कोशी प्रदेशले यो संस्करणमा उत्कृष्ट प्रदर्शन गर्दै आएको छ ।
यसअघि कोशीले बाग्मती प्रदेशको चितवनमा सम्पन्न प्रथम अन्तरप्रदेश राष्ट्रिय खेलकुदमा स्वर्ण जितेको थियो । गत वैशाखमा भएको प्रतिस्पर्धाअन्तर्गत फाइनल खेलमा सुदूरपश्चिम प्रदेशलाई २–० गोलले हराउँदै कोशीले स्वर्ण जितेको थियो । त्यसबेला जेनिफर मगर र समीक्षा मगरले एक–एक गोल गरेका थिए ।
कोशीले जारी संस्करणको महिला लिग जितेमा खेलाडीहरूलाई जनही एक–एक लाख रुपैयाँ पुरस्कार दिने प्रदेश सरकारले घोषणा गरिसकेको छ । खेलाडीहरूलाई हौसला प्रदान गर्नका लागि कोशीका मुख्यमन्त्री हिक्मतकुमार कार्कीले उक्त पुरस्कार राशि घोषणा गरेका थिए ।
एन्फा कम्प्लेक्स सातदोबाटोमा जारी लिगमा विभागीय तीनसहित १० टोलीको सहभागिता छ । जसमा कोशीसँगै विभागीय टोली त्रिभुवन आर्मी क्लब, एपीएफ क्लब, नेपाल पुलिस क्लब, संकटा क्लब, बागमती युथ क्लब, वालिङ नगरपालिका, चन्द्रपुर नगरपालिका,सुदूरपश्चिम र कर्णाली प्रदेश छन् ।
लिगको विजेताले १० लाख र उपविजेताले पाँच लाख रुपियाँ पुरस्कार पाउने एन्फाले जनाएको छ । यस्तै लिगको उत्कृष्ट खेलाडीलाई एक लाख, फेयर प्ले टोलीलाई एक लाख ५० हजार, विधागत उत्कृष्ट खेलाडीलाई जनही ५० हजार रुपियाँ प्रदान गरिनेछ ।
