२४ भदौ, विराटनगर ।
चौथौ संस्करणको युरोपियन नेसन्स लिगअन्तर्गत आज नौ खेलहरू हुँदै छन् । आइतबार रातिबाट सुरु भएको दोस्रो चरणको खेलअन्तर्गत आज १८ वटा टोलीले खेल्न आँटेका हुन् ।
आजको आकर्षक खेलका रूपमा सन् २०१८ को विश्वविजेता फ्रान्स र फिफा वरीयताको छैटौं टोली बेल्जियमले खेल्ने छन् । यो खेल फ्रान्सको लियोनस्थित ग्रुपमा स्टेडियममा नेपाली समयानुसार राति १२ः३० बजे हुने छ ।
फ्रान्सको टिममा एम्बाप्पेसहित र केही नवप्रतिभावान खेलाडी पनि छन् । मुख्य प्रशिक्षक डिडियर डेशच्याम्पको टोलीमा एट्लेटिक मड्रिडका एन्टोइन ग्रिजम्यान, पिएसजीका ओसमान डेम्बेलेलगायत खेलाडी समावेश छन् ।
त्यसबाहेक रियल मड्रिडकै फेर्लान मेन्डी, अल इतिहादका एनगोलो काँटे, एसी मिलानका थियो हर्नान्डेज, इन्टर मिलानका मार्कस थोरम, पिएसजीका रान्डल कोलो मौनीलगायत खेलाडी फ्रान्सको टिममा छन् ।
आज फ्रान्स पहिलो जित निकाल्ने योजनाका साथ मैदान प्रवेश गर्ने छ । यसअघि पहिलो खेलमा फ्रान्स इटालीसँग ३-१ गोलले पराजित भएको थियो ।
यता, बेल्जियम भने लगातार दोस्रो जितको खोजीमा हुने छ । म्यानचेस्टर सिटीका स्टार केभिन डी ब्रुयनप्रेरित बेल्जियमले पहिलो खेलमा इजरायलमाथि ३-१ गोलको जित दर्ता गरेको थियो ।
सन् २०१८–१९ मा पोर्चुगलमा आयोजित पहिलो संस्करणको नेसन्स लिगको उपाधि घरेलु टोली पोर्चुगलले नेदरल्यान्ड्सलाई हराउँदै जितेको थियो । सन् २०२०–२१ को युइएफए नेसन्स लिगको विजेता फ्रान्स हो । इटालीमा आयोजित उक्त संस्करणमा उसले त्यसबेला स्पेनलाई हराउँदै उपाधि उचालेको थियो ।
नेदरल्यान्ड्समा भएको अघिल्लो संस्करणमा क्रोएसियामाथि पेनाल्टीमा जित निकाल्दै स्पेन नेसन्स लिगको उपाधि जितेको थियो ।
आज हुने खेलहरूः
१. साइप्रस भर्सेस कोसोभो- बेलुकी ९:४५ बजे
२. टर्की भर्सेस इज्ल्यान्ड- राति १२:३० बजे
३. फ्रान्स भर्सेस बेल्जियम- राति १२:३० बजे
४. स्लोभेनिया भर्सेस कजाकिस्तान- राति १२:३० बजे
५. रोमनिया भर्सेस लिथुनिया- राति १२:३० बजे
६. इजराइल भर्सेस इटाली- राति १२:३० बजे
७. नर्वे भर्सेस अस्ट्रिया- राति १२:३० बजे
८. मोन्टेनेग्रो भर्सेस वेल्स- राति १२:३० बजे
