२५ भदौ, काठमाडौं ।
नेकपा माओवादी केन्द्रका सांसद सूर्यमान तामाङले उपसभामुख इन्दिरा रानामगरको नैतिकताको प्रश्न उठाउनुअघि नक्कली भुटानी शरणार्थी प्रकरणलाई हेर्न सरकारलाई सुझाव दिएका छन् ।
मंगलबारको प्रतिनिधिसभा बैठकमा बोल्दै उनले नक्कली भुटानी शरणार्थी प्रकरण कहाँ पुग्यो ? भन्दै प्रश्नसमेत गरे ।
उनले भने, ‘उपसभामुखको विषयमा नैतिकताको कुरा धरै गरियो । भुटानी शरणार्थीको के के भयो ? यसबारेमा हामी स्पष्ट हुन चाहन्छौं ।’
संघीय संसद्को तल्लो सदन प्रतिनिधिसभाको उपसभामुख बनेको १९ महिनापछि नै एमालेले पदीय आचरणअनुकल काम नगरेको भन्दै रानामगरको राजीनामा माग्न थालेको छ ।२०७९ माघ ७ गते उपसभामुखमा बहुमतले निर्वाचित भएकी राष्ट्रिय स्वतन्त्र पार्टी (रास्वपा) की सांसद रानामगरलाई हटाउने तयारी सत्तारूढ दलहरूको छ ।
रास्वपा र नेकपा एमालेको घाँटी जोडिँदासम्म रानाले पदीय आचरण कायम नगरेको विषय आचरणको प्रस्तावसम्म पुग्न पाएको थिएन । तर, अहिले नयाँ सत्ता समीकरणमा रास्वपा बाहिरिएसँगै प्रधानमन्त्री केपी शर्मा ओली उपसभामुख रानालाई हटाउन तम्सिएका हुन् । प्रधानमन्त्री ओलीकै प्रस्तावअनुसार उपसभामुख रानामगरलाई पदबाट हटाउन सत्तारूढ गठबन्धनले तयारी थालेका छन् ।
