२५ भदौ , एजेन्सी ।
प्रविधिको विकाससँगै प्रतिष्ठित कम्पनीहरुबीच विश्वमै तीव्र प्रतिस्पर्धा भइरहेको छ । पछिल्लो समय अझ ब्यापक भएको आर्टिफिसियल इन्टलिजेन्स एआईले झन प्रविधिलाई अर्काे चरणमा प्रवेश गराएको छ । एआईको ब्यापकतालाई प्राथमितामा राख्दै स्मार्टफोनमा विश्वकै अग्रणी अमेरिकी कम्पनी आइफोनले आइफोन १६ सिरिजका चार मोडल सार्वजनिक गरेकै दिन अर्काे चिनियाँ कम्पनी हुवावेले विश्वकै पहिलो ‘ट्राई–फोल्ड’ स्मार्टफोन सार्वजनिक गरेको छ ।
अमेरिकी कम्पनी एप्पलले आइफोन १६ सार्वजनिक गरेलगत्तै हुवावेले हुवावे मेट एक्सटी ट्राई–फोन सार्वजनिक गरेको हो ।वासिंगटन र बेइजिङबीचको भूराजनीतिक तनावपछि अमेरिकी प्रतिबन्धको सामना गरिरहेको कम्पनीले फेरि पनि एप्पललाई टक्कर दिन खोजेको चर्चा भइरहेको छ । हालसम्म मेट एक्सटीको ३७ लाखभन्दा बढी प्रिअर्डर भइसकेको अन्तर्राष्ट्रिय सञ्चारमाध्यमले जनाएका छन् ।
यो फोन सफल भए हुवावेको ‘कमब्याक’लाई थप मद्दत पुग्ने छ । हुवावेको कन्जुमर बिजनेसका अध्यक्ष यू चेङडोङ (रिचर्ड यू)ले यस फोनको विकासमा पाँच वर्ष लागेको बताएका छन् । “हुवावे मेट एक्सटी विश्वकै पहिलो ट्रिपल–फोल्ड र सबैभन्दा ठूलो तथा पातलो फोल्डेबल स्मार्टफोन हो,” यूले भने, “स्मार्टफोनमा बाहिरी फोल्डिङ र ग्यापबीनको भित्रि फोल्डिङ हासिल गर्नेमा हामी पहिलो भएका छौँ ।”
तीनवटा प्यानल भएको मेट एक्सटीलाई तीनपटक फोल्ड गर्न सकिन्छ । यो रातो र कालो रङमा उपलब्ध छ । यसअघि पनि हुवावेले ल्याएका विशेष फोन मेट ६० र मेट एक्स ५ सहित अहिलेको नयाँ फोनले एप्पललाई चिनियाँ बजारमा चुनौती दिने बताइएको छ । एप्पलको दोस्रो बजार चीनको हिस्सा एप्पलको व्यापारमा करिब २० प्रतिशत छ ।
हुवावे मेट एक्सटीको मूल्य २० हजार युआन आर्थत् करिब तीन लाख ७७ हजार ५४५ रुपैयाँ तोकिएको छ । फोन १६ जीबी ¥याम र ५१२ जीबी वा एक टेराबाइट स्टोरेजको विकल्पमा उपलब्ध छ । मार्केट रिसर्च फर्म क्यानलिसकी रिसर्च म्यानेजर एम्बर लिउले एक वर्षको अवधिमा चिनियाँ स्मार्टफोन बजारमा प्रमुख पाँच स्थान चीनकै ब्रान्डले बनाएको बताएकी छन् । यस्तो अवस्थामा आइफोन १६ सार्वजनिक भएकै दिन हुवावेले विश्वकै पहिलो ट्राइ–फोल्ड स्मार्टफोन सार्वजनिक गरेको हो ।
