२६ भदौ , काठमाण्डौ।
आजको ठीक एक महिना पछाडि यस वर्षको विजयादशमी टिका परेको छ । दशैं सुरु हुने घटस्थापना भने असोज १७ गते रहेको छ । विगतका वर्षमा दशैं सुरु हुनुभन्दा झण्डै एक महिना अगाडि नै लामो तथा मध्यम दूरीमा जाने सार्वजनिक सवारी साधनको अग्रिम टिकट बुकिङ खुलाउने गरिएको थियो ।
दशैंमा घटस्थापनादेखि नै विद्यालय, कलेजलगायतका धेरै संस्था बन्द हुन्छन् । समयमै टिकट खोल्दा घर जान चाहने विद्यार्थीलाई सहज हुने गर्दछ ।तर यस वर्षपनि गएको वर्षजस्तै अग्रिम टिकट बुकिङ खुल्न ढिलाइ भइरहेको छ ।
सार्वजनिक सवारीमा दशैंको अग्रिम टिकट बुकिङ असोज पहिलो सातादेखि खुलाइने तयारी गरिएको छ । यातायात व्यवसायी राष्ट्रिय महासंघका सल्लाहकार सुरेश हमालले असोजको पहिलो सातादेखि अग्रिम टिकट बुकिङ खुलाइने तयारी गरिएको बताएका छन् ।
यातायात व्यवस्था विभागका महानिर्देशक उद्धवप्रसाद रिजालले पनि घटस्थापनाको एक हप्ता अगाडिदेखि टिकट बुकिङ खुलाउनेबारे छलफल भइरहेको बताएका छन् । अहिले सडक मर्मतको लागि पहल भइरहेको भन्दै टिकट बुकिङ खुला गर्ने तयारी समेत अघि बढेको बताएका छन् ।
कतिपय यातायात व्यवसायीले अहिले नै अनलाइनबाट टिकट बुकिङ खुला गरिसकेका छन् । तर यसरी बुकिङ खोल्दा फेक नामबाट टिकट काट्ने प्रवृत्ति बढेर ब्ल्याकमा बेच्ने समस्या पनि आउन सक्ने रिजालले यसबारे आवश्यक समन्वय गरिरहेको उनले बताएका छन् ।
पूर्व अरनिको यातायात प्रालिको भदौ १५ गते नै सञ्चालक समितिको बैठकले भदौ २० गतेबाट अग्रिम टिकट बुकिङ खुल्ला गर्ने निर्णय गरेको थियो । कतिपय यातायात व्यवसायीले भने निरन्तर वर्षाका कारण बाटो बिग्रिएका कारण दशैँका लागि अग्रिम टिकट बुकिङ खुलाउन समस्या परेको बताएका छन् ।
दशैंमा काठमाडौं उपत्यकाबाट २० लाख भन्दा बढी यात्रु बाहिरिने गरेका छन् । यस्तै यस वर्षको दशैं तिहारका लागि सरकारले सहुलियतपूर्ण पसल खोल्ने अन्तिम तयारी गरेको छ । उद्योग वाणिज्य तथा आपूर्ति मन्त्रालय अन्तर्गतको खाद्य व्यवस्था तथा व्यापार कम्पनीले असोज पहिलो साता सहुलियत पसल खोल्ने बताएको छ ।
यस वर्ष अघिल्लो वर्षको तुलनामा बढी सहुलियत पसल खुल्ने भएका छन् । खाद्य कम्पनीका अनुसार, गत वर्ष ४९ वटा यस्ता पसल खुलेका थिए । यस वर्ष ६० भन्दा बढी पसल खोल्ने तयारी गरिएको छ । यस्तै, यस खाद्य व्यवस्था तथा व्यापार कम्पनीले यस वर्ष करिब १,८०० वटा खसीबोका तथा च्यांग्रा भित्र्याउने तयारी गरेको छ ।
