२७ भदौ ,एजेन्सी।
सिचेकसहितको मर्मतका लागि गत ८ असारमा इटली गएको नेपाल वायुसेवा निगमको एउटा वाइडबडी जहाज बिहीबार विहान काठमाडौं फर्किएको छ । निगमको एयरवसको ए३३० को (एन एएलवाई अन्नपूर्ण) नामक जहाज विहीबार विहान साढे ८ बजे त्रिभुवन अन्तर्राष्ट्रिय विमानस्थलमा अवरण गरेको छ ।
वायुेवा निगमका प्रावधिक प्रवक्ता मनोजकुमार साहका अनुसार बुधबार नै आउने तालिका भएपनि जहाज उड्ने बेलामा प्राविधिक समस्या देखिएकोले त्यसको समाधान गरेर पठाउनुपरेका कारण हिजै आउने भनिएपनि आज बिहानमात्रै आइपुगेको पनि निगमले जानकारी दिएको छ ।
निगमको अन्तर्राष्ट्रिय उडानमा रहेका ४ वटा जहाजमध्ये हाल दुई वटा न्यारोबडीले मात्रै नियमित उडान गरिहरेको छन् । वाइडबडी दुइवटा मध्ये एउटा अझै इटलीमै सी चेकमा छ । एउटा भने आज आइपुगेको निगमले जानकारी दिएको हो ।
यो जहाज उडानमा आएसँगै जापान उडानलाई पुनः निरन्तरता दिने निगमका अधिकारीहरुले बताएका छन् । अगस्ट २९ बाट जहाज अभावमा जापान उडान निरन्तर हुन सकेको छैन । सी चेकका लागि इटलीमा रहेको निगमको अर्को वाइडबडी जहाज के.एल.वाई एक महिना पछि काठमाडौं आउने तालिका रहेको निगमले जनाएको छ ।
राष्ट्रिय ध्वजाबाहक नेपाल वायु सेवा निगमसँग २ वटा वाइडबडी र २ वटा न्यारोबडी गरी ४ जहाज रहेका छन् । अहिले मर्मत गरेर ल्याइएको अन्नपूर्ण विमान ६ वर्ष पुरानो विमान हो ।
