२९ भदौ, काठमाडौं ।
शिक्षा, विज्ञान तथा प्रविधि मन्त्री विद्या भट्टराईको अभिव्यक्तिलाई लिएर प्राविधिक शिक्षा तथा व्यावसायिक तालीम परिषद् (सिटिइभिटी) को नेपाल राष्ट्रिय कर्मचारी संगठनले आपत्ति जनाएको छ ।
सिटिइभिटीको अध्यक्षसमेत रहेकी मन्त्री भट्टराईले पदकै गरिमा गिराएको भन्दै संगठनले आपत्ति जनाएको हो । मन्त्री भट्टराईले कर्मचारीलाई लाञ्छना लगाउनु लज्जास्पद भएको निष्कर्ष निकालेको संगठनले विज्ञप्ति जारी गर्दै भनेको छ, ‘मन्त्री भट्टराईले आफू नै अध्यक्ष रहेको र आफ्नै मातहत रहेको संस्थाको बेइज्जत गर्नेगरी सामाजिक सञ्जालमा अभिव्यक्ति दिनुभएको छ ।’
शुक्रबार मन्त्री भट्टराईले सामाजिक सञ्जाल फेसबुकमा स्टाटस लेख्दै सिटिइभिटीसँग सम्बन्धित सम्बन्धन, परीक्षा, प्रमाणपत्र लगायतका काममा कार्यालय प्रमुख, निर्देशक र कर्मचारीले अनावश्यक दबाब दिएको, काममा ढिलाइ गरेको र आर्थिक लेनदेनसमेत गरेको गुनासो प्राप्त भएको भनेकी छन् । साथै, सो विषयमा स-प्रमाण जानकारी गराउन पनि उनले आग्रह गरेकी छन् ।
उक्त विषयलाई लिएर संगठनले विज्ञप्ति जारी गरेको हो । सिटिइभिटीका पदाधिकारी र कर्मचारीले आर्थिक चलखेल गरेका भए वा, सोसम्बन्धी सूचना प्राप्त गरेको भए सोझै कारबाही गर्नसक्ने सामर्थ्य मन्त्रीमा रहेको भए पनि सामाजिक सञ्जालमा भ्रामक अभिव्यक्ति दिएर मन्त्रीले संस्था र आफ्नै पनि गरिमा गिराएको संगठनको आरोप छ ।
