६ असोज, एजेन्सी ।
विज्ञान भन्छ, यो ब्रम्हाण्ड रहेसम्म पृथ्वी, सूर्य र चन्द्रमा रहिरहनेछन् । अहिलेसम्मको वैज्ञानिक खोजमा सूर्य,चन्द्र र पृथ्वीको विकल्प भेटिएका छैनन् । कृतिम रुपमा चाँहे सूर्य किन नबनोस् तर प्राकृतिक रुपमा पृथ्वी , सूर्य र चन्द्रमाको स्थान अरु कसैले लिन सकेका छैनन् ।
चीनले सूर्यभन्दा कयौ गुणा तेज ताप दिने कृतिम सूर्यको विकास गरिरहेको अवस्थामा पृथ्वीले दोस्रो प्राकृतिक भूउपग्रहका रूपमा सानो चन्द्रमा पाउने भएको छ । ब्रम्हाण्डमा अर्काे चन्द्रमा ? त्यो कसरी संभव होला ।
पृथ्वीले क्षुद्र ग्रहलाई चन्द्रमाका रुपमा पाउने भएको हो । यो करिव २ महिना पृथ्वीको सानो चन्द्रमाका रूपमा पृथ्वीको कक्षमा रहने छ । करिब १० मिटर चौडाइको यो क्षुद्रग्रह सेप्टेम्बर २९ मा पृथ्वीको उपग्रह बन्ने देखिएको छ ।
यो क्षुद्रग्रह २०२४पीटी५ ले ५६.६ दिनमा एकपटक पृथ्वीको परिक्रमा गर्नेछ । त्यसपछि नोभेम्बर २५ मा पृथ्वीको गुरुत्वाकर्षण क्षेत्रबाट बाहिरिनेछ । २०२४पीटी५ले ४५ लाख किलोमिटर टाढाबाट पृथ्वीको परिक्रमा गर्नेछ ।
त्यो पृथ्वी र चन्द्रमामाको तुलनामा १० गुणाभन्दा बढी टाढा हो । यसको गति तीन हजार ५४० किलोमिटर प्रतिघण्टा रहनेछ । गएको महिना मात्र पत्ता लागेको २०२४पीटी५ ‘अर्जुन एस्ट्रोइड बेल्ट’को क्षुद्रग्रह हो ।
पृथ्वीको कक्षमा एक फन्को लगाएपछि यो अर्जुन क्षुद्रग्रह बेल्टमै जाने बताइएको छ । कैयौँ सानाठूला अन्तरिक्ष चट्टान वा एस्ट्रोइड मिलेर बनेको अर्जुन क्षुद्रग्रह बेल्टले करिब १५ करोड किलोमिटर टाढाबाट सूर्यको परिक्रमा गर्छ ।
त्यो लगभग सूर्यबाट पृथ्वीको दूरीसमान हो । सन् २०२५ जनवरी ९ मा २०२४पीटी५ पृथ्वीबाट फेरि १८ लाख किलोमिटर टाढा देखिने र त्यसपछि आफ्नै बेल्टमा फर्कने बताइएको छ । सन् २०५५ नोभेम्बरमा फेरि फिर्ता आउने तर झनै टाढा करिब ५८ लाख किलोमिटर पर रहने अनुमान गरिएको छ ।
गएको अगस्ट ७ मा एस्ट्रोइड टेरेस्ट्रियल–इम्प्याक्ट लास्ट अर्लट सिस्टमबाट २०२४पीटी५ पत्ता लागेको थियो । त्यसको अघिल्लो दिन यो पृथ्वीबाट निकै नजिक पाँच लाख ६७ हजार किलोमिटर टाढाबाट गएको थियो ।
यसअघि, २०२४पीटी५ सन् २००३ फेब्रुअरी, १९८२ अप्रिल र १९६० मार्चमा पृथ्वीनजिक आएको ठानिएको छ । यसपछि सन् २०५५ नोभेम्बर र २०८४ जनवरीमा पनि पृथ्वीनजिक आउने अनुमान गरिएको छ ।
सूर्यको परिक्रमा गरिरहेका बेला गुरुत्वाकर्षण बलको असन्तुलनका कारण क्षुद्रग्रह पृथ्वीको गुरुत्वाकर्षण क्षेत्रभित्र आउने स्थिति बन्छ । यस्ता घटना पृथ्वीमा निकै दुर्लभ र दशकौँमा हुने गरेको बताइएको छ ।
यो निकै सानो र मधुरो भएका कारण खुला आँखा वा सामान्य टेलिस्कोप र दूरबिनबाट भने देखिने छैन । यसलाई २२ म्याग्निच्युड भएको एडभान्स्ड अब्जर्भेटरीबाट मात्रै हेर्न सकिनेछ ।
