७ असोज, काठमाण्डौ ।
जिल्ला प्रहरी कार्यालय धनुषाको हिरासतबाट नौ जना थुनुवा फरार भएका छन् । आज बिहान साढे ३ देखि ४ बजेको समयभित्र पुरुष थुनुवा कक्षको भेन्टिलेसन तोडेर ९ जना थुनुवा फरार भएका छन् ।
जिल्ला प्रहरी कार्यालय धनुषाका प्रवक्ता डीएसपी रञ्जन अवाले जानकारी दिएअनुसार ९ जना थुनुवा फरार भएका हुन् । उनले फरार नौ जनामध्ये सत्यम झा नामका थुनुवालाई भने जनकपुरको जनकचोकबाट पक्राउ गरिएको पनि जानकारी दिए ।
बाँकी फरारहरुको खोजी कार्य चलिरहेको पनि उनले बताए । फरार थुनुवा लागुऔषध तथा अभद्र व्यवहारअन्तर्गत पक्राउ परेका थिए । फरार हुनेमा लागुऔषध मुद्दाका रञ्जित मण्डल, रोशनकुमार मण्डल, अभास्कर कुमार यादव, विशाल मुखिया र अमितकुमार छन् ।
यस्तै अभद्र व्यवहारमा पक्राउ परेका बिक्की कार्की, मनिष मण्डल र सुमित मेस्तर पनि फरार भएका छन् । थुनुवा कक्षको ड्युटीमा एकजना प्रहरी बसेका अवाले बताए ।
‘हिरासत कक्षको फलामको डण्डीहरु तोडेर उनीहरु भागेको छेखिन्छ,’ उनले भने । फरार भएका थुनुवाहरूको खोजीका लागि सम्भावित ठाउँमा बिहानैदेखि ‘सर्च’ अभियान चलाएको उनले बताए । सीमा क्षेत्रमा समेत निगरानी बढाइएको छ ।
