७ असोज, एजेन्सी ।
आईसीसी विश्वकप लिग–२ प्रतियोगिताअन्तर्गत क्यानडासँगको दोस्रो खेलमा पनि नेपाल पराजित भएको छ । गए राति भएको खेलमा क्यानडाले नेपालविरुद्ध ५ विकेटको जित निकालेको हो । सुरुवाती ब्याटिङ गरेको नेपाल १८१ रनमा अलआउट भएको थियो ।
१८२ रनको विजय लक्ष्य पछ्याएको क्यानडाले ४२ ओभरमा ५ विकेट गुमाउँदै १८६ रन बनाएर लक्ष्य पूरा गरेको हो । नेपालका लागि सन्दीप लामिछानेले सर्वाधिक ४९ रन बनाए । उनले ५ चौका र १ छक्का प्रहार गरेका थिए ।
सन्दीपको ओडिआई करियरको यो उत्कृष्ट ब्याटिङ प्रदर्शन हो । यस अघि सन्दीपले सन् २०२३ मा पिएनजीसँग ५० बलमा नट आउट ३५ रन बनाएका थिए । त्यस्तै गुल्सन झा ३२, करण केसी २४, सोमपाल कामी २१, अर्जुन साउद १० र आरिफ शेखले १० रन जोडे ।
अन्य ब्याटरहरूले दोहोरो अंकमा रन जोड्न सकेनन् । बलिङतर्फ क्यानडाका लागि कलिम सनाले ३ विकेट लिए । त्यस्तै डिलन हेलिङ्गर, हर्स ठाकेरले २÷२ विकेट लिए । प्रविण कुमार र साद बिन जाफरले १÷१ विकेट लिए ।
ब्याटिङतर्फ नवनीत धालीवालले ८७ र परगत सिंहले ६४ रनको अर्धशतकीय पारी खेले त्यस्तै हर्स ठाकेरले १३ तथा निकोलस किर्तोनले ११ रन जोडे । बलिङतर्फ सन्दीप लामिछानेले २ विकेट लिए । त्यस्तै करण केसी, ललित राजवंशी र गुल्सन झाले १÷१ विकेट लिए ।
क्यानडा, नेपाल र ओमानबीच क्यानडामा जारी त्रिकोणात्मक सिरिजमा नेपालले आफ्नो पहिलो खेलमा क्यानडासँग १०३ रनको फराकिलो अन्तरको पराजय व्यहोरेको थियो । त्यस्तै आफ्नो दोस्रो खेलमा नेपाल ओमानसँग एक विकेटले पराजित भएको थियो ।
क्यानडामा जारी सिरिजमा नेपालले खेलेका तीनै खेलमा पराजय व्यहोरेको हो । त्रिकोणात्मक सिरिजमा सोमवार नेपाल र ओमानबीच खेल हुनेछ । ८ टोलीको सहभागिता रहेको लिग टुमा १४ अंकका साथ क्यानडा शीर्ष स्थानमा छ । ७ खेलमा २ अंकका साथ नेपाल अंकतालिकाको पुछारबाट दोस्रोमा छ । ६ खेलमा ओमानको ५ अंक छ ।
