८ असोज ,एजेन्सी ।
लेबनानमा इजरायलले आक्रमण गर्दा ४९२ जनाको मृत्यु भएको छ । लेबनानको स्वास्थ्य मन्त्रालयका अनुसार मारिनेमा ३५ बालबालिका र ५८ महिलाहरु समेत छन् । आक्रमणमा १ हजार ६४५ जना घाइते भएका छन् ।
घाइतेहरुमध्ये केहीको अवस्था गम्भीर रहेकाले मृतकको संख्या बढ्नसक्ने अनुमान छ । इजरायली सेनाले हिजबुल्लाहका १ हजार ३०० आश्रयस्थलमा आक्रमण गरेको जनाएको छ ।
यो आक्रमण गत अक्टुबर ७ मा हमासविरुद्ध युद्ध सुरु गरेयताकै भयानक भएको अन्तर्राष्ट्रिय सञ्चार माध्यमहरुले जनाएका छन् । इजरायलले हमासविरुद्ध आक्रमण सुरु गरेपछि हिजबुल्लाहले हमासलाई सघाउने घोषणा गरेको थियो ।
त्यसैले इजरायलले हिजबुल्लाहलाई पनि निशाना बनाएको हो । लेबनानका स्वास्थ्य मन्त्री फिरास अबियादले इजरायलको आक्रमणबाट सर्वसाधारणका घर, मेडिकल सेन्टर, एम्बुलेन्स र कारहरुमा पनि क्षति पुगेको बताएका छन् ।
इजरायली क्षेत्रमा हिजबुल्लाहले दुई सयभन्दा बढी रकेट प्रहार गरेको थियो । इजरायली पक्षका दुई जना घाइते भएको इजरायली सेनाले जनाएको छ । इजरायल र लेबनानका हिजबुल्लाह लडाकुहरुबीच आक्रमण सुरु भएपछि विश्वका केही देशहरुले दुवै पक्षलाई संयमित हुन आह्वान गरेका छन् ।
यो संघर्षले ठूलो युद्धको रुप लिन सक्ने चिन्ता व्यक्त हुँदै आएको छ । इरानले इजरायलको आक्रमणको कडा शब्दमा निन्दा गरेको छ । लेबनानमा रहेको विद्रोही समूह हिजबुल्लाहले पेजर र वाकीटकी विष्फोटले आफ्नो समूहलाई शक्तिशाली धक्का लागेको प्रतिक्रिया दिइरहेको बेला इजरेलले लेबनानमा सोमबार ठूलो हवाई आक्रमण गरेको हो।
इजरायली सेनाले लेबनानका मानिसहरूलाई हिजबुल्लाहले हतियार र रकेट लुकाएर राखेका भवनहरू नजिकका घरहरू खाली गर्न चेतावनी दिएपछि आक्रमणहरू गरिएको इजरेली गुप्तचर आइडीएफका प्रवक्ता ड्यानियल हगारीले बताएका छन् ।
लेबनानमा विगत पाँच दिनदेखि इजरायलबाट लगातार हवाई हमला भइरहेको छ । इजरायलले गत हप्ता बिहीबारदेखि विशेष गरी दक्षिणी लेबनानमा आक्रमण गरेको छ र हिजबुल्लाहविरुद्ध कारबाही गर्न आह्वान गरेको छ ।
यसमा लेबनानको बेका उपत्यकामा हिजबुल्लाह विरुद्धको ठूलो आक्रमण पनि समावेश छ। सोमबारको आक्रमणमा इजरायली सेनाले दक्षिणी लेबनानमा हिजबुल्लाहसँग सम्बन्धित लक्ष्यहरूमा आक्रमण गरिरहेको र त्यस्ता थप आक्रमणहरू गरिने बताएको छ।
लेबनानका प्रधानमन्त्री नाजिब मिकातीले इजरायली आक्रमणको निन्दा गरेका छन् । उनले आक्रमणहरूलाई लेबनानी गाउँ र शहरहरू ध्वस्त पार्ने योजनाको एक हिस्साको रूपमा वर्णन गरेका छन् ।
अल अरबियाका अनुशार उनले इजरायलको आक्रमण रोक्न राष्ट्रसंघलाई समेत आग्रह गरेका छन् । उनले इजरायली आक्रमणले निर्दोषको ज्यान लिइरहेको र यो अपराध भएको बताएका छन् ।
इजरायली मिडियाले आक्रमण गर्नु अघि आइडीएफले दक्षिणी लेबनानी नागरिकहरूलाई हिजबुल्लाह स्थानहरूबाट टाढा रहन भनेको बताएका छन् । सोमबार लेबनानको राजधानी बेरुत र देशका अन्य क्षेत्रहरूमा नागरिकहरूले घरहरू तुरुन्तै खाली गर्न भनिएको सन्देश प्राप्त गरेका थिए ।
इजरायल र लेबनानी समूह हिजबुल्लाहबीच गत वर्षको अक्टोबरदेखि तनावपूर्ण अवस्था रहेको छ । इजरायली सेनाले गाजामा आक्रमण गरेपछि हिजबुल्लाह र इजरायलको सीमामा गोलीबारी भइरहेको छ ।
गत हप्ता लेबनानमा हजारौं पेजर र वाकी–टकीहरू विस्फोट हुँदा यो तनाव झनै बढेको छ । हिजबुल्लाहले यसका लागि इजरायललाई दोषी ठहर गर्दै बदलास्वरूप रकेट प्रहार गरेको थियो। यसपछि इजरायलले लेबनानमा हवाई हमला गरेको छ जसमा ठूलो जनधनको क्षति भएको छ ।
पेजर र वाकीटकी विष्फोटले इजरायल र लेबनानबीच ठूलो र घातक युद्धको सम्भावना बढेको हिजबुल्लाहका प्रमुख हसन नसरल्लाहले बताएका छन् । लेबनानलाई आतङ्कित बनाउने पटक पटकको आक्रमणपछि नसरल्लाहले आक्रामक भएर प्रतिशोधको चेतावनीसमेत दिएका हुन् ।
३७ जना हिजबुल्लाहका सदस्यको ज्यान जानेगरी इजरायलले नै पेजर र वाकीटकी विष्फोट गराएको हिजबुल्लाहको आरोप छ । यो घटनामा ३ हजार ५ सयभन्दा धेरै मानिस घाइते भएका छन् ।
गाजामा युद्धविराम नभएसम्म इजरायलविरुद्ध हिजबुल्लाहले लडाइँ जारी राख्ने जनाएको छ । यता लेबनानी हिजबुल्लाह समूहसँगको तनावपछि इजरायलले हाइफा सहरमा सुरक्षा सतर्कता बढाएको छ ।
हिजबुल्लाह समूहले निरन्तर रकेट आक्रमण जारी राखेपछि इजरायलले हाइफा सहर अन्य उत्तर क्षेत्रका मानिसहरुलाई भेला हुन, भीड गर्न प्रतिबन्ध लगाएको हो । यस क्षेत्रमा तनाब बढ्दै गएपछि अमेरिकी सरकारले समेत आफ्नो नागरिकहरूलाई लेबनान छोड्न निर्देशन दिइसकेको छ ।
