१५ असोज , काठमाण्डौ।
नेपाल आयल निगमले पेट्रोलियम पदार्थको मूल्य घटाएको छ । भारतीय आयल कर्पोरेसन (आइओसी) ले पठाएको नयाँ मूल्यसूची अनुसार निगमले पेट्रोल, डिजेल, मट्टीतेल र हवाई इन्धनको मूल्य घटाएको छ।
नयाँ मूल्य अनुसार गएरातिदेखि लागू हुने गरी पेट्रोलमा एक रुपैयाँ, डिजेल÷मट्टीतेलमा समान दुई रुपैयाँ, हवाई इन्धन आन्तरिकमा ६ रुपैयाँ तथा बाह्यमा प्रति हजार लिटरमा ४५ रुपैयाँले घटाएको जनाएको छ ।
खाना पकाउने एलपी ग्यासको मूल्य भारतबाट ४१ नेपाली रुपैयाँ बढेर आएपनि मुख्य चाडपर्वलाई लक्षित गरी तत्कालका लागि यथावत राखिएको निगमले जनाएको छ । साथै आयल निगमले पर्वका बेला इन्धनको आपूर्तिमा कुनै समस्या नहुने दाबी गरेको छ ।
निगमले तय गरेको नयाँ मूल्य देशका विभिन्न ठाउँ अनुसार लागू भएको छ । निगमले पेट्रोलियम पदार्थको मूल्यका लागि ठाउँहरूलाई तीन वर्गमा विभाजन गरेको छ । पहिलो वर्गमा पर्ने चारआली, विराटनगर, वीरगन्ज, जनकपुर, अमलेखगन्ज, भलवारी, नेपालगन्ज र धनगढी क्षेत्रमा अब पेट्रोलको मूल्य प्रतिलिटर एक सय ५५ रूपैयाँ ५० पैसा पर्नेछ।
त्यस्तै डिजेल र मट्टीतेल एक सय ४४ रूपैयाँ ५० पैसा पर्नेछ । त्यस्तै दोस्रो वर्गमा सुर्खेत र दाङ क्षेत्र पर्छन् । सुर्खेत र दाङ क्षेत्रमा अब पेट्रोलको मूल्य प्रतिलिटर एक सय ५७ रूपैयाँ प्रतिलिटर पर्नेछ ।
त्यस्तै डिजेल र मट्टीतेल एक सय ४६ रूपैयाँ पर्नेछ । तेस्रो वर्ग अन्तर्गत काठमाण्डौ, पोखरा र दिपायल क्षेत्रमा अब पेट्रोल प्रतिलिटर १५८ रूपैयाँ, डिजेल र मट्टीतेल एक सय ४७ रूपैयाँ पर्नेछ ।
