२२ असोज , एजेन्सी ।
फ्रान्सेली राष्ट्रपति इमानुएल म्याक्रोनले मध्यपूर्वमा थप द्वन्द्व रोक्न इजरायललाई हतियार आपूर्तिमा प्रतिबन्ध लगाउन माग गरेपछि इरानविरुद्ध आक्रमणको अन्तिम तयारीमा रहेको इजरेललाई नराम्रो झट्का लागेको छ ।
फ्रान्सेली राष्ट्रपतिको यो अभिब्यक्तिविरुद्ध इजरेल प्रधानमन्त्री बेन्जामिन नेतन्याहुले कडा शब्दमा आलोचना गर्दै युद्ध जित्न फ्रान्सको सहयोग नचाहिने बताएको भोलिपल्टै ५७ देश फ्रान्सको बाटो तथा इजरेलका लागि तगारो बनेका छन् ।
नेत्याहुले म्याक्रोनलाई मुर्खको संज्ञा समेत दिएका थिए । तर म्याक्रोनको यो कदमलाई ५७ इस्लामिक देशको संगठन ओआईसीले स्वागत गरेको छ । साथै स्वतन्त्र प्यालेस्टाइनलाई मान्यता दिन पनि माग गरिएको छ ।
इजरेल कुनैपनि हालतमा प्यालेस्टाइनलाई स्वतन्त्र राष्ट्रको मान्यता दिन तयार रहेको छैन् ।वास्तवमा, फ्रान्सेली राष्ट्रपति म्याक्रोनले आइतबार गाजामा युद्धविराम गर्ने समय आएको बताएका थिए।
म्याक्रोनका अनुसार लेबनानलगायत मध्यपूर्व क्षेत्रमा बढ्दो द्वन्द्व रोक्न र यसको राजनीतिक समाधानका लागि इजरायललाई हतियारको आपूर्ति रोक्नु सबैभन्दा महत्त्वपूर्ण रहेको बताएका थिए । इस्लामिक कर्पोरेशनको संगठन (ओआईसी) ले आइतबार राति एक विज्ञप्ति जारी गर्दै म्याक्रोनको मागको स्वागत गरेको छ।
ओआईसीका अनुसार फ्रान्सेली राष्ट्रपतिको माग अन्तर्राष्ट्रिय मानवीय नियम अनुसार रहेको छ । यो अन्तर्राष्ट्रिय न्यायालयको कानूनी सल्लाह र यस मुद्दासँग सम्बन्धित संयुक्त राष्ट्र संघको प्रस्तावसँग पनि मिल्छ।
ओआईसीले फ्रान्ससँग सन् १९६७ को युद्धअघिको सीमास्थितिको आधारमा स्वतन्त्र प्यालेस्टाइनलाई मान्यता दिन र पूर्वी अल कुद्सलाई प्यालेस्टाइनको राजधानीको रूपमा मान्यता दिन माग गरेको छ ।
ओआईसीले फ्रान्सलाई दुई राज्य समाधानको समर्थन गर्न र प्यालेस्टिनी जनताको आत्मनिर्णयको अधिकारमा आफ्नो अडान दोहोर्याउन अपील गरेको छ। फ्रान्ससँगै ओआईसीले विश्वका अन्य देशहरूलाई पनि मध्यपूर्वको अवस्था सुधार्न इजरायललाई दिँदै आएको सैन्य र आर्थिक सहायता रोक्न आग्रह गरेको छ ।
ओआईसीका अनुसार इजरायली सेनालाई दिइने सैन्य र आर्थिक सहायता रोकेर मात्र प्यालेस्टिनी जनतामाथि हुने अत्याचार रोक्न सकिन्छ । ओआईसीले विश्वका सबै देशलाई इजरायलविरुद्ध आवश्यक कदम चाल्न आग्रह गरेको छ ।
५७ देशको इस्लामिक समूहले इजरायललाई हतियारको कारोबारसँगै प्यालेस्टाइनका लागि हानिकारक हुने यस्ता व्यापार बन्द गर्नुपर्ने बताएको छ । ओआईसीले मध्यपूर्वमा बढ्दो द्वन्द्व रोक्न इजरायलमाथि कडा प्रतिबन्ध लगाउन अपिल गरेको छ ।
ताकि इजरायली सेना प्यालेस्टिनी भूभागमा आफ्नो कब्जा तुरुन्तै त्याग्न बाध्य होस् र लेबनानमा जारी आक्रमणलाई रोक्न सकियोस्। इजरेलविरुद्ध म्याक्रोनको अभिब्यक्ति र ५७ इस्लामिक देशको समर्थनपछि युरोपेली देशमा प्यालेस्टाइनको समर्थनमा प्रर्दशन भएका छन् ।
हजारौं समर्थक प्यालेस्टिनी प्रदर्शनकारीहरूले आईतवार सिड्नी र अन्य प्रमुख अस्ट्रेलियाका शहरहरूको सडकमा जुलुस निकालेका छन् । साथै उनीहरुले मध्यपूर्वमा युद्धको तत्काल अन्त्यको लागि आह्वान गरेका छन् ।
सिड्नीमा दिउँसो हाइड पार्कमा प्रदर्शन शुरु भएको थियो । जब मानिसहरूले प्यालेस्टाइन र लेबनानको झण्डाका साथसाथै अहिले युद्धविराम र फ्री प्यालेस्टाइन लेखिएका प्लेकार्डहरू बोकेका थिए ।
उनीहरुले प्यालेस्टाइन र लेबनानको समर्थनमा नारा समेत लगाएका थिए । सबै स्वतन्त्रता, समानताको लागि लड्न पाउने प्रदर्शनकारीहरुले बताएका छन् ।यस्तै प्यालेस्टिनी समर्थक हजारौं प्रदर्शनकारीहरूले इटलीको रोममापनि प्रर्दशन गरेका छन् ।
रोममा भेला भएर युद्धको तत्काल अन्त्य र युद्धविरामको लागि आह्वान गर्दै उनीहरुले प्रदर्शन गरेका हुन् । प्रदर्शनकारीहरू दक्षिणी रोमको ओस्टिएन्समा भेला भइ प्रदर्शनमा उत्रिएका थिए । धेरैले प्यालेस्टाइन र लेबनानी झण्डा बोकेर नारा लगाएका थिए ।
प्रदर्शनकारीले ¥यालीलाई शहर केन्द्रित र प्रहरी घेराबाहिर सार्न खोज्दा केही प्रदर्शनकारी र प्रहरीबीच झडप भएको थियो । प्रदर्शनकारीहरूले प्रहरी अधिकारीहरूलाई कागजको बम र बोतलहरू प्रहार गरे ।
प्रहरीले पानीको तोप र अश्रु ग्यास प्रहार गरेको थियो । झडपमा करिव ३० कानून प्रवर्तन अधिकारी र तीन प्रदर्शनकारी घाइते भएको चिनियाँ समाचार संस्था सिन्ह्वाले जनाएको छ ।
