२५ असोज , एजेन्सी ।
आगामी दुई वर्षपछि हुने फिफा विश्वकप फुटबलको छनोट खेलमा साविक विजेता अर्जेन्टिनाले भेनेजुएलासँग बराबरी खेल्दै अंक बाँडेको छ । शुक्रबार बिहानका राति भएको दक्षिण अमेरिकी छनोट खेलमा अर्जेन्टिना भेनेजुएलासँग १–१ गोलको बराबरीमा रोकिएको हो ।
भेनेजुएलामा भएको खेलमा अर्जेन्टिनाले सुरुआती अग्रता बनाएको थियो । खेलको १३औं मिनेटमा निकोलास ओटामेन्डीले गोल गर्दै अर्जेन्टिनालाई सुरुआती अग्रता दिलाएका थिए ।तर, खेलको भेनेजुएलाका सालोमन रन्डनले बराबरी गोल गरेका थिए ।
यस खेलबाट राष्ट्रिय टोलीमा फर्किएका अर्जेन्टिनी कप्तान लियोनल मेस्सी भने गोलविहीन बने ।कोपा अमेरिकाको फाइनल खेलमा चोट बोकेका मेस्सी यसै खेलमार्फत् मैदान फर्किएका हुन् । उनले विश्वकप छनोटअन्तर्गत गत सेप्टेम्बर महिनामा भएका दुई खेल खेल्न सकेनन् ।
भेनेजुएलासँग बराबरीमा रोकिएपछि मेस्सीले मैदान चाहेजस्तो नहुँदा अपेक्षाअनुरूप प्रदर्शन गर्न नसकिएको टिप्पणी गरेका छन् । सन् २०२६ मा मेक्सिको, क्यानडा र अमेरिकामा हुने विश्वकपको छनोट खेलमा अर्जेन्टिनाको यो पहिलो बराबरी हो ।
बराबरीसँगै अंक तालिकामा शीर्ष स्थानमा रहेको अर्जेन्टिनाले नौ खेलमा १९ अंक जोडेको छ । आज बिहान भएको अर्को खेलमा सर्वाधिक धेरै पटकको विश्वविजेता ब्राजिलले कमब्याक जित निकालेको छ ।
बिहीबार राति भएको दक्षिण अमेरिकी छनोट खेलमा ब्राजिलले चिलीलाई उसैको मैदानमा २–१ गोलले हराएको हो । ब्राजिलको जितमा इगोर जेसस र लुइज हेनरिकले एक–एक गोल गरे । चिलीका इडुआर्डो भर्गसले एक गोल गरे ।
भर्गसले खेलको दोस्रो मिनेटमै गोल गरेपछि चिलीले सुरुआती अग्रता बनाएको थियो । तर, पहिलो हाफको इन्ज्युरी समयमा जेससले गोल गर्दै ब्राजिललाई बराबरीमा फर्काए । निर्धारित समय सकिन एक मिनेट बाँकी छँदा हेनरिकले गोल गर्दै ब्राजिललाई २–१ गोलले जिताए ।
पछिल्ला पाँच खेलमध्ये ब्राजिलले पहिलो जित निकालेको हो । यससँगै तालिकाको चौथो स्थानमा रहेको ब्राजिलले नौ खेलमा १३ अंक जोडेको छ । यसैगरी अर्को खेलमा कोलम्बिया १० खेलाडीमा सीमित बोलिभियासँग १–० गोलले पराजित भयो ।
कोपा अमेरिकाको उपविजेता कोलम्बियालाई बोलिभियाले घरेलु मैदानमा आतिथ्यता दिएर पराजित गरेको हो । खेलको २०औं मिनेटमा हेक्टर कुएलासले रातो कार्ड पाएपछि १० खेलाडीमा सीमित बनेको बोलिभियालाई जिताउन ५८औं मिनेटमा मिगुएल टेर्केरसले गरेको गोल नै काफी बन्यो ।
हारसँगै दोस्रो स्थानको कोलम्बियासँग नौ खेलमा १६ अंक छ । बोलिभिया भने १२ अंकका साथ छैटौं स्थानमा छ । अंक तालिकाको तेस्रो स्थानमा रहेको उरुग्वेले भने शनिबार बिहान पेरुसँग खेल्ने छ । पेरुसँग जित निकालेमा उरुग्वे दोस्रो स्थानमा उक्लिने छ ।
दक्षिण अमेरिकाका १० वटा राष्ट्रले विश्वकपमा छनोट हुन प्रतिस्पर्धा गरिरहेका छन् । साविक विजेता अर्जेन्टिना, सर्वाधिक धेरै पाँच पटकको उपविजेता र पहिलो संस्करणको विजेता उरुग्वेजस्ता राष्ट्रले छनोट खेल खेलिरहेका छन् ।
आगामी विश्वकपमा साउथ अमेरिकाबाट ६ टोली सीधै छनोट हुँदा एउटा टोलीले अन्तरमहादेशीय प्ले अफ खेल्न पाउने छ ।सेप्टेम्बर २०२३ बाट सुरु भएको दक्षिण अमेरिकी राष्ट्रको छनोट खेल सेप्टेम्बर २०२५ सम्ममा सकिने छ ।
विश्वकपमा छनोट हुने तीन टोलीको भने टुंगो लागिसकेको छ। क्यानडा, मेक्सिको र अमेरिकाले भने आयोजकको हैसियतमा विश्वकप खेल्ने छन् ।
