२८ असोज, एजेन्सी ।
के विश्व क्रिकेटका दुई पावरहाउस तर कट्टर दुस्मन भारत र पाकिस्तानले एकअर्काको जित हेर्न चाहान्छन् ? के भारतले पाकिस्तानको जितको र पाकिस्तानले भारतको जितको कहिल्यै कामना गर्लान् ? सुमधुर सम्बन्ध भएका देशहरुले त एकअर्काका प्रतिद्वन्दीको जित चाहादैनन् भने भारत र पाकिस्तानबीच यस्तो कल्पनामा पनि हुन सक्दैन भन्ने धेरैको जवाफ हुन्छ ।
तर खेलमा सधैभरी त्यसो नहुदो रहेछ, यतिबेला भारतीयहरुले पाकिस्तानको जितको कामना गरिरहेका छन् । यो सुन्दा तपाइँलाई आश्चार्य लाग्न सक्छ । तर यो सत्य हो । जारी आईसीसी महिला टी २० क्रिकेटमा यो दुर्लभ संयोग देखिएको छ ।
उक्त दुर्लभ संयोग यूएईमा जारी प्रतियोगिताको नकआउट समीकरणमा देखिएको हो । जहाँ भारतको अघिल्लो चरणमा जाने सम्भावना जीवित रहन पाकिस्तानले न्युजिल्यान्डलाई पराजित गर्नुपर्ने छ । पाकिस्तानले न्युजिल्यान्डलाई पराजित गरे मात्रै भारत सेमिफाइनलमा प्रवेश गर्नेछ ।
यसैले आज राति हुने खेलमा सिंगो भारतीय पक्ष न्युजिल्याण्डविरुद्ध पाकिस्तानको जितको पक्षमा हुनेछन् । यो खेल यूएईको दुबई अन्तर्राष्ट्रिय क्रिकेट स्टेडियममा नेपाली समयअनुसार राति ७ः४५ बजे सुरु हुनेछ ।
अघिल्लो खेलमा भारत अस्ट्रेलियासँग ९ रनले पराजित हुन पुगेको थियो । यसैले पाकिस्तानले सामान्य मार्जिनले जितेमात्रै भारत अघिल्लो चरणमा जाने भएको हो । चार खेलपछि अस्ट्रेलियाले ४ वटैमा जितसहित ८ अंक जोडेको छ ।
भारतको ४ खेलमा २ जित र २ हारसहित ४ अंक भएको छ । ३ खेलपछि न्युजिल्यान्डको ४ अंक भएको छ । न्युजिल्याण्डले २ मा जित र १ मा हार बेहोरेको छ । श्रीलंकाले अंक बटुल्न सकेको छैन । पाकिस्तानले ३ खेलपछि एक जितसहित २ अंक बटुलेको छ ।
यसैले अघिल्लो चरणमा जानको लागि पाकिस्तानलाई न्युजिल्यान्डविरुद्ध भारी मतान्तरको जित आवश्यक छ । न्युजिल्यान्ड जिते भारत र पाकिस्तान दुवै आउट हुनेछन् । किनकि जितले न्युजिल्यान्डको ६ अंक हुनेछ ।
पाकिस्तानले न्युजिल्यान्डविरुद्ध साँघुरो अन्तरको जित निकाले मात्रै भारतको लागि भाग्य खुल्नेछ । समूह बीमा इंग्ल्याण्ड, साउथ अफ्रिका, वेस्ट इण्डिज मध्येका दुई देश सेमिफाइनल पुग्नेछन् । समूह एमा अष्ट्रेलिया सबै ४ खेलमा जित निकाल्दै सेमिफाइनल प्रवेश गरिसकेको छ ।
भारत ४ अंक सहित दोस्रो स्थानमा छ । जसको नेट रनरेट प्लस ० दशमलव ३२२ छ । चार अंक सहित न्युजिल्याण्ड तेस्रो नम्बरमा छ । उसको नेट रनरेट ० दशमलव २८२ छ । समूहको अन्तिम खेलमा न्युजिल्याण्ड र पाकिस्तान खेल्दैछन् ।
न्युजिल्याण्डले जितेको खण्डमा सिधै सेमिफाइनल पुग्नेछ । यसबाट भारत र पाकिस्तान बाहिर हुनेछन् । यदि पाकिस्तानले न्युजिल्याण्डलाई हराएको खण्डमा न्युजिल्याण्ड र भारतको अंक बराबरी हुनेछ र नेट रनरेटका आधारमा नतिजा निर्धारण हुनेछ ।
त्यस्तो अवस्थामा भारत अघि बढ्ने छ। यसैले १ अर्ब ४५ करोड भारतीय आज राति हुने खेलमा पाकिस्तानको जितको पक्षमा छन् । यद्यपि फराकिलो जित होइन । जसलाई क्रिकेटमा कहिलेकाहीँ हुने दुर्लभ संयोग मानिएको छ ।
