९ मंसिर ,काठमाण्डौ।
सहकारीको वचत रकम अपचलनको अभियोगमा गएको कात्तिक २ गते पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई थप १५ दिन हिरासतमा राख्न अदालतले अनुमति दिएको छ । कास्की जिल्ला अदालतका न्यायाधीश हिमलाल बेल्बासेले प्रहरीलाई थप १५ दिन हिरासतमा राखेर अनुसन्धान गर्न अनुमति दिएको हो ।
यसअघि कार्तिक २५ मा उनलाई १३ दिन हिरासतमा राख्न प्रहरीलाई अनुमति दिएको थियो । उनीमाथि पोखराको सुर्यदर्शन सहकारीको रकम गोरखा मिडिया नेटवर्कमा लगेर अपचलन गरेको आरोपमा कास्की प्रहरीले अनुसन्धान गरिरहेको छ ।
रवि लामिछानेसँगै पूर्वडीआईजी छविलाल जोशी र लिला पछाईलाई पनि १५ दिन थुनामा राख्न अनुमति दिएको छ । उनीमाथि सहकारी ठगी, संगठित अपराध र सम्पत्ति शुद्धीकरणसम्बन्धी कसुरमा अनुसन्धान गरिरहेको कास्की प्रहरी उनलाई पाँचौँपटक म्याद थपका निम्ति अदालतमा पेस गरेको थियो ।
यसअघि, गएको कात्तिक २५ गते १३ दिन म्याद थप भएको थियो । उक्त म्याद सकिएपछि उनलाई आइतबार अदालतमा उपस्थित गराइएको थियो । काठमाडौंस्थित रास्वपा केन्द्रीय कार्यालयबाट कात्तिक २ गते पक्राउ परेका लामिछानेमाथि अनुसन्धान गर्न प्रहरीलाई अदालतले पहिलोपटक ६ दिन म्याद दिएको थियो ।
दोस्रोपल्ट सात, तेस्रोचोटि १० र चौथोपटक १३ दिनको म्याद दिइएको थियो । पाँचौँपल्ट म्याद थपपछि उनलाई काठमाडौं ल्याउने प्रहरीको तयारी छ । उनीसँगै पूर्वडीआईजी छविलाल जोशीलाई म्याद थपका निम्ति अदालत लगिएको थियो ।
पूर्वडीआईजी जोशीमाथि पनि १५ दिन म्याद थप भएको छ । यो म्यादको अवधिमा समेत गरेर रविको हिरासत बसाई ५१ दिन हुनेछ । सम्पत्ति शुद्धीकरणको अभियोगमा प्रतिवादीलाई ९० दिनसम्म प्रहरी हिरासतमा राख्न सकिने व्यवस्था छ ।
सहकारी ठगीसम्बन्धी ऐनमा अभियुक्तलाई २५ दिन हिरासतमा राखेर अनुसन्धान गर्न पाइन्छ। यस्तै संगठित अपराधमा ६० दिन र सम्पत्ति शुद्धीकरण निवारणसम्बन्धी ऐनमा अभियुक्तलाई ९० दिन हिरासतमा राखेर अनुसन्धान गर्न पाइने कानुनी प्रावधान छ।
उक्त समयभित्र अभियुक्तमाथि अनुसन्धान पूरा गरेर अदालतमा अभियोजन दर्ता गरिसक्नुपर्ने हुन्छ । कानून व्यवसायीहरुका अनुशार सहकारी ठगीमा २५ दिन, संगठित अपराधमा ६० दिन र सम्पत्ति शुद्धीकरणमा ९० दिन जोडेर १७५ दिन हिरासतमा राख्न सकिदैन् ।
एउटै हिरासतभित्र तीनवटै कानुनअन्तर्गत अनुसन्धान भएकाले रविमाथिको अधिकतम समय भनेको ९० दिन मात्र हो। अहिलेसम्म सहकारी ठगी, संगठित अपराध र सम्पत्ति शुद्धीकरणमा देखिएका कागजात र प्रमाण देखाएर लामिछानेसँग बयान लिइएको छ।
अनुसन्धानका बाँकी काम भनेको लामिछानेको मोबाइल परीक्षण गर्न फरेन्सिक ल्याब पठाएको र उक्त परीक्षण प्रतिवेदन आउन बाँकी रहेको, घरजग्गा, सम्पत्ति, सेयर र बैंकिङ कारोबारको विवरण आउन बाँकी रहेको उल्लेख छ।
उक्त प्रतिवेदन आएपछि प्रमाण देखाएर लामिछानेसँग थप बयान लिने तयारी छ। लामिछानेमाथि सम्पत्ति शुद्धीकरण र संगठित अपराध ऐन आकर्षित हुँदैनथ्यो भने सहकारी ठगीको अभियोजन पेस गर्ने समय भने बितिसकेको छ ।
अदालतमा अभियोजन दर्ता गरेपछि लामिछानेसहित अभियुक्तहरूलाई पुर्पक्षका लागि कारागार पठाउने कि हाजिरी जमानीमा छाड्ने भनेर अदालतले निर्णय गर्नेछ । सुर्यदर्शन सहकारी ठगीमा मुछिएका १९ जनाविरुद्ध जिल्ला अदालतमा मुद्धा विचाराधीन छ।
सुर्यदर्शन सहकारी ठगी, संगठित अपराध र सम्पत्ति शुद्धीकरण मुद्दामा पूर्वडिआइजी छविलाल जोशी हिरासतमा बसेको पनि आइतबार ६८ दिन पुगिसकेको छ । सम्पत्ति शुद्धीकरण ऐनअनुसार अब आज थपिएको १५ दिनपछि अधिकतम ७ दिनमात्र हिरासतमा राख्न पाइन्छ।
त्यसअघि नै चारै जनाविरुद्ध अदालतमा अभियोग दर्ता गर्ने सरकारी वकिलको तयारी छ। रविलाई अब काठमाडौं र त्यसपछि रवि र छविललाई नै चितवन लैजाने प्रहरीको तयारी छ ।
