२५ मंसिर, काठमाण्डौ।
बाराको पञ्चवर्षीय गढिमाई मेलाबाट सिरहा फर्किन लागेको स्कार्पियो रौतहटको चन्द्रनिगाहपुरमा दुर्घटना हुँदा आठ जनाको मृत्यु भएको छ । रौतहट प्रहरीका अनुसार दर्शनार्थी चढेको बा १६ च ३१६२ नम्बरको स्कर्पियो चन्द्रनिगाहपुर ४ स्थित पूर्वपश्चिम राजमार्गमै रुखमा ठोक्किएर दुर्घटना भएको हो ।
गाडीमा सवार ८ जनाको घटनास्थलमै मृत्यु भएको र अन्य पाँचजना घाइते भएका रौतहटका प्रहरी प्रबक्ता डिएसपी दिपक कुमार रायले जानकारी दिए । स्कर्पियो अनियन्त्रित भइ रुखमा ठोक्किएर दुर्घटना भएको हो ।
रौतहटका प्रहरी प्रमुख एसपी दिलीप घिमिरेका अनुसार गाडी रुखमा ठोक्किएको र त्यहाँको अवस्था हेर्दा चालक निदाएपछि गाडी अनियन्त्रित भएर दुर्घटना भएको देखिन्छ । मृतकको शव अहिले चन्द्रनिगाहपुरकै सिभिल हस्पिटलमा राखिएको र घाइतेको उपचार पनि त्यही भइरहेको छ ।
गाडी पूर्णरुपमा क्षतिग्रस्त बनेको छ । स्कार्पियोमा सवार भएकाहरु बाराको गढीमाई मेला हेरेर सिराहातर्फ जाँदै गरेका प्रहरीले जनाएको छ । उनीहरु एकै गाउँका हुन् । पूर्वपश्चिम राजमार्गमा पर्ने चन्द्रपुर नगरपालिका– ४ स्थित धन्सार–लमाहा सडक खण्डमा गएराति १ बजे सोे स्कर्पियो दुर्घटनामा परेको हो ।
‘मध्यराति तीव्र गतिको कारण स्कर्पिओ अनियन्त्रित भएर सडकबाट तल खसेर दुर्घटना भएको देखिन्छ,’ जिल्ला प्रहरी कार्यालय रौतहटका इन्सपेक्टर रामकुमार महतोले भने, ‘सडकबाट तल खसेपछि स्कार्पिओ रुखमा ठोक्किँदा धेरै मानवीय क्षति भएको हो।’
दुर्घटनामा ज्यान गुमाउनेमा सिराहाको अर्नामा गाउँपालिका– ३ बंठियाटोल बस्ने वर्ष ६० कि लरुवतीदेवी महरा, सोही ठाउँकी ३० वर्षीया उर्मिला महरा, ५० वर्षीया रामकुमारी महरा, ५५ वर्षीया महगींदेवि महरा, ६२ वर्षीया फूलमन्तीदेवी चमार, ६० वर्षीया रामकुमारिदेवी महरा, ३० वर्षीया सकुन्तलादेवी महरा र अर्नामा ५ बलुवाटोल घर भएका स्कार्पिओ चालक ४० वर्षीय श्रीकुमार यादव छन् ।
दुर्घटनामा सिराहाको अर्नामा ३ कै ३० वर्षीया राधा राम, सोही ठाउँका उमेश रामका २ वर्षीय छोरा आर्यन राम, २५ वर्षीया देवकुमारी महरा, उनका ७ वर्षीय छोरा रितिक महरा र ६० वर्षीया कन्यादेवी महरा घाइते भएका छन् ।
इन्सपेक्टर महतोका अनुसार केही घाइतेको चन्द्रनिगाहपुरस्थित ट्रमा सेन्टरमा उपचारको क्रममा मृत्यु भएको हो । धेरैले घटनास्थलमै ज्यान गुमाएका हुन् । गम्भीर अवस्थाका एक जनालाई थप उपचारको लागि वीरगन्ज रेफर गरिएको छ ।
दुर्घटनाको जानकारी प्राप्त हुनासाथ इलाका प्रहरीका कार्यालय चन्द्रनिगाहपुरबाट डीएसपी कुमार राईको कमाण्डमा प्रहरी टोली घटनास्थलमा पुगेको थियो । तीव्र गतिको स्कार्पिओ आफैँ अनियन्त्रित भई रोड भन्दा दाहिने साइडको रुखमा ठोकिँदा दुर्घटना भएको राईले बताए ।
घटनास्थल चन्द्रनिगाहपुरबाट करिब ८ किलोमिटर पश्चिममा पर्छ । मृतकको शव अहिले चन्द्रपुरस्थित सरकारी अस्पतालको शव गृहमा राखिएको छ ।
