११ माघ ,एजेन्सी ।
सिंगो बलिउडमा सुरक्षालाई लिएर हलचल मच्चाएको चर्चित बलिउड स्टार सैफ अली खानमाथि भएको आक्रमणको घटनामा नयाँ रहस्य बाहिर आएको छ। चक्कु प्रहारबाट गम्भिर घाइते भएका खान उपचारपछि घर फर्किएका छन् भने उनले प्रहरी समक्ष दिएको बयानले नयाँ रहस्य खोलेको छ।
प्रहरीसँगको बयानमा उनले चोरी गर्न आएका व्यक्तिलाई आफूले नियन्त्रणमा लिँदा उनले चक्कु प्रहार गरेको बताएका छन् । सैफका अनुसार त्यस रात उनको कान्छा छोरा जेह नानी सुसारेसँग सुतेका थिए ।
राति अचानक चिच्याएको आवाज आएपछि सैफ र करिना जेहको कोठामा गएका थिए । यसअघि सैफलाई उनका जेठा छोरा इब्राहिमले अटो रिक्सामा हालेर अस्पताल लगेको भनिएकोमा उनले प्रहरीसँगको बयानमा आफूलाई छोराले नभएर म्यानेजरले अस्पताल लगेको उनले बताएका छन् ।
भारतीय संचारमाध्यामका अनुशार उनले प्रहरीसँगको बयानमा भनेका छन्, म र करिना हल्लाखल्ला सुनेर ब्युँझियौं । दुवै जना जेहको कोठामा जाँदा त्यहाँ लिमा (सुसारे)सँगै एक जना अपरिचित पुरुष बहस गरिरहेका थिए । ती पुरुषको हातमा चक्कु थियो । मैले उनलाई को हो र किन आएको भनेर सोधेँ । उसले केही बताएन । कोठाभित्र मेरो सानो छोरो सुतिरहेको थियो । त्यसैले उसलाई खतरा हुनसक्ने सोचेर मैले उक्त व्यक्तिलाई च्यापचुप समातेर आफ्नो नियन्त्रणमा लिएँ । त्यसले मबाट फुत्किने प्रयासमा मलाई पटक–पटक चक्कु हान्यो । मेरो पिठ्यूँ, हात र गर्दनमा चोट लाग्यो । म घायल भएँ । मैले घाइते अवस्थामै धक्का दिएर आक्रमणकारीलाई लडाएँ । त्यसपछि कोठाको धोका थुनेर हामी निस्कियौं । कर्मचारीले जेहलाई लिएर माथि तल्लामा गए । हल्लाखल्ला सुनेर १२ औं तल्लाबाट अरु कर्मचारीहरु झरे, तर जेहको कोठा खोलेर हेर्दा त्यो व्यक्ति त्यहाँ थिएन । कर्मचारीले सबैतिर खोजे, तर ऊ कतै पनि भेटिएन । मलाई मेरो म्यानेजरले अटोरिक्सामा हालेर अस्पताल पु¥यायो ।
मुम्बई प्रहरीले सैफको बयान दर्ता गरेको हो । यसअघि उनकी कामदार अरियामा फिलिप र पत्नी करिना कपुरको बयान प्रहरीले लिइसकेको छ । सैफलाई आक्रमण गरेको आरोपमा पक्राउ परेका आरोपी सरिफुल इस्लामलाई २९ जनवरीसम्म पुलिस हिरासतमा पठाइएको छ।
उनलाई अनुसन्धान गर्न दिएको समय आज समाप्त भएको थियो । शाहजादलाई आजै बान्द्रा अदालतमा पेस गरिएको थियो। प्रहरीले शहजादको सात दिनको हिरासत मागेको थियो, तर पाँच दिन मात्र पाएको छ।
यसअघि उनलाई पाँच दिनको पुलिस हिरासतमा राखिएको थियो। तर, यस सम्बन्धमा पुलिसले अहिलेसम्म कुनै जानकारी दिएको छैन। सिसिटिभी फुटेजमा आक्रमणकारी र पक्राउ परेका सरिफुल एक अर्काभन्दा फरक रहेको शाहजादका वकिलले अदालतलाई बताएका छन् ।
अदालतमा शेहजादका बुबाको बयानलाई पनि उल्लेख गरिएको छ । जहाँ सिसिटिभी फुटेजमा देखिएका ब्यक्ति र आफ्नो छोरा फरक रहेको उनले बताएका छन् । १५ जनवरीमा सैफमाथि आक्रमण भएको थियो। अभियुक्त शहजाद सैफको घरमा प्रवेश गरेका थिए ।
भने उनलाई ८ पटक चक्कुले आक्रमण गरिएको थियो । मुम्बई पुलिसको अपराध शाखाले घटनाको अनुसन्धान गर्न ३५ वटा टोली गठन गरेको थियो । जसमा ५० जनालाई सोधपुछ गरेपछि लोकल–एक्सप्रेस रेलको सिसिटिभी स्क्यान गरेपछि प्रहरीले १९ जनवरीमा ठाणेबाट शहजादलाई पक्राउ गरेको थियो।
तर अहिले पनि केही भारतीय संचारमाध्यामहरुले प्रहरीले गलत व्यक्तिलाई पक्राउ गरेको र फरेन्सिक रिपोर्टमा उनको अनुहार सीसीटीभी फुटेजमा देखिएको व्यक्तिसँग मेल नखाएको दाबी गरिरहेका छन् ।
तर प्रहरीले भने सैफको घरबाट पक्राउ परेका अभियुक्तकै फिंगरप्रिन्ट फेला पारेको दाबी गरेको भारतीय संचारमाध्यमहरुले उल्लेख गरेका छन् ।
