१३ माघ , एजेन्सी ।
कहिले कर बढाउने, पनामाथि नियन्त्रणको आरोप, समुन्द्रमा दादागिरी गरेको लगायतका आरोप त कहिले चीनसंग मिलेर काम गर्न इच्छा जागेको डोनाल्ड ट्रम्पको बयानले विश्वमै तरंग मच्चाइरहेका बेला अमेरिकाले सुपर पावरको आफ्नो कुर्सी खोसिदेलाकी कि भनेर चीनसंग धेरैजसो गरम र कहिलेकाँही नरम व्यवहार गर्दै आएको छ ।
यसबीच फेरि अमेरिकाले चीनमाथि थप आरोप लगाएको छ । खासमा अमेरिकाले कोभिड–१९ लाई लिएर ठूलो खुलासा गरेको दावी गरेको छ । जसले एक पटक फेरि चीनलाई कटघरामा उभ्याएको छ ।
अमेरिकाको केन्द्रीय गुप्तचर एजेंसी (सीआईए)ले दाबी गरेको छ कि कोरोना भायरस एक प्रयोगशालाबाट नै लीक भएको थियो । एजेंसीले संकेत गरेको छ कि यो भाइरस चीनमा नै पहिलो चोटी देखिएको थियो ।
अर्थात उसले चीनको ल्याबबाट नै कोभिड १९ बाहिरिएको आशंका गरको हो । एजेंसीले आफ्नो नयाँ रिपोर्ट नयाँ निर्देशक जोन ¥याटक्लिफको शपथ ग्रहणपछि सार्वजनिक गरेको हो । शनिबार सार्वजनिक गरिएको यस प्रतिवेदनमा चीनलाई कोभिड–१९ का लागि जिम्मेवार ठहराइएको हो ।
यद्यपि सीआईएको प्रतिवेदनमा यस दाबीलाई प्रमाणित गर्ने पर्याप्त प्रमाण नभएको पनि उल्लेख गरिएको छ । ट्रम्प प्रशासनका सीआईए निर्देशक जोन ¥याटक्लिफको आदेशमा सार्वजनिक गरिएको यो प्रतिवेदन बाइडेन प्रशासन र सीआईएका पूर्वनिर्देशक विलियम बन्र्सको आदेशमा तयार पारिएको हो ।
समाचार संस्था एपीको रिपोर्ट अनुसार, यसअघि पनि विभिन्न प्रतिवेदनले कोरोना भाइरस चीनको प्रयोगशालाबाट फैलिएको हुनसक्ने शंका व्यक्त गरेका थिए । तर, केही प्रतिवेदनहरूले यो प्राकृतिक रूपमा फैलिएको दाबी गरेका थिए ।
यो प्रतिवेदन कुनै नयाँ गुप्तचर जानकारीको आधारमा तयार गरिएको भने होइन । डेली मेलका अनुसार अमेरिकी अधिकारीहरूले कोरोना भाइरसको फैलावटबारे सीआईएको नयाँ धारणा पुष्टि गर्ने कुनै नयाँ प्रमाण भने छैन ।
सीआईएले शनिबार जारी गरेको एक सन्देशमा भनेको छ,‘उपलब्ध रिपोर्टहरूको आधारमा कोभिड–१९ महामारीको उत्पत्तिमा प्रयोगशालासँग सम्बन्धित कारण प्राकृतिक कारणभन्दा बढी सम्भावित भएको हाम्रो ‘कम आत्मविश्वास’ सहितको मूल्यांकन छ ।’ एजेन्सीले भनेको छ, ‘कोभिड–१९ महामारीको उत्पत्तिमा प्रयोगशालासँग सम्बन्धित र प्राकृतिक दुवै सम्भावना अझै पनि विश्वसनीय मानिन्छ ।’
सीआईएको उक्त सन्देशमा भनिएको छ, ‘हामी यो मूल्यांकनमा ‘कम आत्मविश्वास’ राख्छौं र कुनै नयाँ गुप्तचर जानकारी वा सान्दर्भिक विवरण प्राप्त भएमा त्यसलाई निरन्तर समीक्षा गर्नेछौं ।’ सीआईएको यो रिपोर्टले कोरोना भाइरसलाई पुनः एकपटक चर्चामा ल्याएको छ ।
यो रिपोर्ट भाइरसको प्रसार, यसको वैज्ञानिक विशेषता र चीनको भाइरोलोजी प्रयोगशालामा गरिएका अनुसन्धानको नयाँ विश्लेषणका आधारमा तयार गरिएको हो । गुप्तचर अधिकारीहरूले चिनियाँ सहयोग अभावले यो रहस्य सायद कहिल्यै पूर्ण रूपमा समाधान हुन नसक्ने बताएका छन् ।
अमेरिकी सांसदहरूले जासुसी संयन्त्रहरूलाई कोभिड–१९ को उत्पत्तिबारे थप जानकारी प्रदान गर्न दबाब दिएका छन् । विश्व अझै कोभिड महाव्याधिको प्रभावहरूसँग जुधिरहेकोले यो विषय अमेरिकी र विश्व राजनीतिका लागि अत्यन्त महत्त्वपूर्ण छ ।
यता चीनले अमेरिकी आरोप र कोभिड–१९ को उत्पत्तिबारे कुनै पनि प्रकारका अडकलबाजीलाई आधारहीन र राजनीति प्रेरित भएको बताएको छ । शनिबार एक चिनियाँ अधिकारी लिउ पेंग्यूले भनेका छन्, ‘हामी भाइरसको उत्पत्तिलाई राजनीतीकरण र कलंकित गर्न खोज्ने प्रयासको कडा विरोध गर्दछौं । हामी सबैलाई विज्ञानको सम्मान गर्न र षड्यन्त्र सिद्धान्तहरूबाट टाढा रहन अपिल गर्दछौं ।’
वैज्ञानिकहरूले कोरोना भाइरस चमेरोबाट फैलिएको हुनसक्ने अनुमान गरेका थिए । यसअघि पनि कोरोनासँग मिल्दोजुल्दो अन्य भाइरस चमेरोबाट फैलिएको आधारमा उनीहरूले यो निष्कर्ष निकालेका थिए ।
