२४ माघ ,काठमाण्डौ।
नेकपा माओवादी केन्द्रका अध्यक्ष पुष्पकमल दाहाल प्रचण्डले कहिले जिल्ला जिल्लाको मर्निंग वाकमा त कहिले आफ्नोसहित प्रतिष्पर्धीहरुको समेत किल्लाबाट हालको सत्ता गठबन्धन टुट्नै लागेको र ओली नेतृत्वको सरकार ढल्नै लागेको दाबी पछिल्ला महिनाहरुमा गर्दै आएका छन् ।
जसको खण्डनमा प्रधानमन्त्री केपी शर्मा ओलीदेखि कांग्रेस–एमालेका नेताहरुले समय खर्च गर्दै आएका छन् । यता क्रमभंगता रुचाउँदै आएका प्रचण्डले भने आफ्नो सोही दाबीलाई आज संसदमा पनि निरन्तरता दिए ।
आज बसेको प्रतिनिधिसभाको बैठकमा प्रचण्डले सरकार लामो समय टिक्छ भन्ने विश्वास स्वयं ओलीलाई नभएको दाबी गरे । त्यसको पुष्टि ओलीले पटक पटक समयअघि नै शेरबहादुर देउवालाई कुर्सी सुम्पिन्छु भन्ने कुराले गरेको प्रचण्डको भनाइ थियो ।
यस्तै वर्तमान सरकार असफल भइसकेको, माफियाको टेस्टमा परेको दाबी गरे । ‘प्रचण्ड’ले आजको बैठकमा सम्बोधन गर्ने क्रममा कम्तीमा ७९ वटा प्रश्न गरेका छन् । उनले एमाले, केपी शर्मा ओली र कांग्रेसमाथि प्रश्नको वर्षा गरे ।
सामाजिक सञ्जाल नियमन विधेयक ल्याएर अभिव्यक्तिको अपराधीकरण गर्न खोजेको देखि जनताको मुख थुनेर विवेक नै बन्धक बनाउने नियत देखिएको भनी सरकारको आलोचना गरे । यस क्रममा उनले ओलीको नियत त पहिलादेखि नै प्रस्ट भइसकेको तर अहिले आएर कांग्रेस पनि विवेकहीन समाज बनाउन लागिपरेको त होइन भनेर प्रश्न गरे ।
संविधान संशोधनको एजेन्डामा सरकार बनाइएको तर अहिले प्रधानमन्त्रीले नै यो एजेन्डा छाडेकोमा पनि उनले प्रश्न उठाए । दाहालले सरकारले अपराधी धुने डिटर्जेन्ट बनाइरहेको आरोप लगाए ।
वर्तमान सरकारले आफ्नो नेतृत्वको सरकारले सुरु गरेका भ्रष्टाचारका विभिन्न काण्डको छानबिन अवरुद्ध पारेको भन्दै आपत्ति जनाए । उनले भने, ‘अहिलेका प्रधानमन्त्रीले सार्वजनिक कार्यक्रममै ढुक्कले भनिरहनुभएको छ, प्रचण्ड र रविवाला सरकारले हामीलाई थुन्न खोजेपछि यो सरकार बनाउन पर्यो ।
मेरो नेतृत्वको सरकार ढलेसँगै जनता प्रष्ट थियो, अब खोजिने छैन, त्रिभुवन विश्वविद्यालयको जग्गा,’उनले भने, ‘अब रोकिने छ, ललिता निवासको विस्तृत अनुसन्धान र जग्गा फिर्तीको प्रक्रिया । अब अवरुद्ध हुनेछ, भुटानी शरणार्थी प्रकरणको निष्पक्ष अनुसन्धान ।
अब खोजिनेछैनन्, अतिक्रमण गरिएका सरकारी जमिन । अब सामसुम हुनेछ, भुटानी शरणार्थी प्रकरण । त्यही भयो । त्यही बिन्दुबाट जनतामा कांग्रेस एमाले गठबन्धनप्रति मोहभंग पनि सुरु भयो ।’
सरकारी जग्गा हिनामिनाका काण्डहरूको छानबिन कहाँ पुग्यो भनेरसमेत दाहालले सरकारलाई सोधेका छन् । त्यस्तै बिचौलियाहरूलाई नयाँ स्टक एक्सचेन्ज दिन लागिएको उनको दाबी छ । सात महिनाको अवधिमा सरकारका कामले गति नलिएको उल्लेख गर्दै सर्वसाधारणमा निराशा बढ्दै गएको बताए ।
सम्बोधनकै क्रममा उनले सहकारी ठगीमा छानबिनका क्रममा रहेका राष्ट्रिय स्वतन्त्र पार्टीका सभापति रवि लामिछानेको प्रतिरक्षा गरे । उनले सत्ता साझेदार कांग्रेसले सामाजिक सञ्जालसम्बन्धी विधेयकमा मौन बसेको आरोप पनि लगाए ।
अभिव्यक्ति स्वतन्त्रतामाथि हनन हुने खालको विधेयक आउँदा पनि कांग्रेस नबोलेको भन्दै आलोचना गरे । अध्यक्ष दाहालले कांग्रेस नेताहरूको विवेकमाथि पनि प्रश्न उठाए । उनले प्रधानमन्त्री केपी ओलीले विरोध सहन नसक्ने भए पनि कांग्रेसमा भने त्यस्तो किन भयो भनेर प्रश्न गरे ।
कांग्रेसलाई प्रश्न गर्दै अध्यक्ष दाहालले सोधे, ’के हो यो सामाजिक सञ्जाल नियमन विधेयक ? के हो यसमा नेपाली कांग्रेसको आधिकारिक धारणा ? हिजो त तपाईंहरू यसको विपक्षमा उभिनुभएको थियो ।
आज कता हुनुहुन्छ ? तपाईंहरू सत्ताका लागि मात्रै सहकार्यमा हुनहुन्छ कि राजनीतिक दृष्टिकोणमै परिवर्तन आइसकेको हो ? कि कांग्रेसलाई पनि ओलीजीलाई जस्तै प्रश्नमुक्त र विवेकमुक्त नेपाल चाहिएको हो ? के हो तपाईंहरुको वैचारिकी ?’ यस्तै ’प्रचण्ड’ले डेडिकेटेड तथा ट्रंकलाइन विवादमा सरकारमाथि माफियाको ठूलो टेस्ट भएको आरोप लगाएका छन् ।
“डेडिकेटेड तथा ट्रंकलाइनबाट उपभोग गरेको उद्योगहरूले प्रिमियम महसुल असुलीमा मन्त्री र प्रधानमन्त्री तहबाटै भएको अवरोधले के प्रमाणित गरेको छ भने माफियाहरूको शक्ति र सरकारको निरीहता स्थापित भएको छ,” उनले भने, यसबीचमा के भएन ?
प्रधानमन्त्रीले रोस्ट्रमबाटै प्राधिकरणलाई गाली गर्नुभएन कि ? महसुल उठ्ने सुनिश्चिता नभई काटिएको लाइन जोड्न हुँदैन भन्ने बोर्ड सदस्यलाई बर्खास्त गर्नुभएन कि ? विद्युत् नियमन आयोगको दुरुपयोग गरिएन कि ?” यस्तै, ऊर्जामन्त्री दीपक खड्काले रातारात प्राधिकरणमा कार्यकक्ष बनाउने र पटकपटक स्पष्टीकरण सोध्दै कुलमान घिसिङमाथि अपमान गरेको आरोप लगाए ।
अहिले जारी भएका अध्यादेशको प्रक्रियामा मात्र होइन नियतमा पनि खोट रहेको बताए । उनले किसानको आफ्नो स्वामित्वको जग्गाको सानो टुक्रालाई घडेरीको रूपमा बेच्न पाउने अधिकार कुण्ठित गर्दै गरिब जनता र साना रियल स्टेटहरूलाई ध्वस्त गरेर सबै आवास प्रयोजन र घर–घडेरीको जग्गालाई ठूला रियल स्टेट र भूमाफियाहरूको कब्जामा पु¥याउने वातावरण तयार गर्न खोजिएको बताए ।
यस्तै अहिलेको सरकारले नागरिकलाई दुःख दिइरहेको आरोप पनि प्रचण्डको छ । सम्झाइबुझाइ गरेर पठाउन सकिने घटनामा पनि कडा–कडा मुद्दा लगाइरहेको उनको गुनासो छ । प्रचण्डले भने, ‘सम्झाइबुझाइ गरेर पठाउन सकिने घटनामा समेत नागरिकलाई हतकडी लगाएर एउटा जिल्लाबाट अर्को जिल्ला दगुराइँदैछ, कडा–कडा मुद्दा लगाइँदैछ ।
यो सत्ताको घमन्ड हो कि जनतासँग डर हो ?’ प्रचण्डले पनि त्यसै घटनाप्रति संकेत गर्दै सरकार निरंकुश ढंगले अघि बढ्न खोजेको र नागरिकलाई दुःख दिन खोजेको आरोप लगाएका हुन् । उनले सरकारले राजनीतिक प्रतिशोध साँध्ने र त्यसका लागि राज्यको दुरुपयोग सामान्य हुन थालेको टिप्पणी समेत गरे ।
यता पाथीभरा केवलकारको विवादमा झडप हुँदा प्रहरीले गोली चलाएको र सामाजिक सञ्जाल नियमन विधेयक ल्याएर अभिव्यक्ति स्वतन्त्रतालाई वैधानिक रुपमै नियन्त्रण गर्न खोजेको घटनासमेत जोड्दै प्रचण्डले सरकार दमनको बाटो हिँडेको आरोप लगाए ।
प्रचण्डले प्रश्न गरे, ‘यो के हो ? नागरिक सम्प्रभुताभन्दा माथि हो तपाईहरु ? संविधानभन्दा माथि हो ? तपाईहरु मालिक र नागरिक दास हो ?’ यसक्रममा ’प्रचण्ड’ले नुवाकोटको शेरा दरबारमा प्रकरणमा आफूलाई जोड्न सकिन्छ कि भनेर प्रधानमन्त्री नै लागेको दाबी गरे ।
उनले प्रधानमन्त्री केपी शर्मा ओली र गृहमन्त्री रमेश लेखकको पनि चासो रहेको सुनाए । शेरा दरबारमा आफू जोडिए छानबिन गर्न उनले चुनौती दिए । “शेरा दरबारमा मेरो नाम जोडिन्छ भने मबाटै छानबिन गर्नुस् । बेला–बेला क्यान्टोनमेन्ट भनेर गीत गाएको सुन्छु । छानबिन गरे भयो त,” प्रचण्डको भनाइ छ ।
