काठमाडौँ,असोज १३
शहीद स्मारक ए डिभिजन लिग फुटबलको उद्घाटन खेलमा त्रिभुवन आर्मी न्यूरोड टिम एनआरटीले बराबरी खेलेका छन् । शनिबार भएको उद्घाटन खेलमा आर्मी र एनआटीले २,२ गोलको बराबरी खेलेका हुन् ।
खेल अवधिभर उत्कृष्ट प्रदर्शन गरेका एनआरटीका गोलरक्षक अजित प्रजापतिले अन्तिममा धेरै समय बल होल्ड गर्दा आर्मीले डिबक्सभित्रैबाट फ्रि किक पाएको थियो, जसमा सन्तोष तामाङले उत्कृष्ट गोल गर्न सफल भए ।
सातदोबाटोस्थित एन्फा कम्प्लेक्समा भएको खेलमा एनआरटीले १२ औं मिनेटमा नै अग्रता लिएको थियो । उसका रोजित पुडासैनीले गोल गरेका थिए । ३८ औं मिनेटमा आर्मीका सन्तोषले पेनाल्टीमार्फत बराबरी गोल फर्काए ।
दोस्रो हाफमा आर्मीको प्रदर्शन केही सुधारियो तर, ६४ औं मिनेटमा राजेश परियारले उत्कृष्ट गोल गरे । तर, इन्जुरी टाइम सकिन केही सेकेण्ड मात्र बाँकी रहँदा प्रजापतिले समय भन्दा धेरै बल होल्ड गर्दा रेफ्रीले इन्डाइरेक्ट फ्रिकिक दिए, जुन एनआरटीका लागि निकै घातक बन्न पुग्यो । सन्तोषको प्रहार पोष्ट बारमा लागेर गोलमा परिणत भयो र आर्मीका हारबाट जोगिन पुग्यो ।
