विराटनगर,असोज १४
स्थानीय जनप्रतिनिधिहरुलाई भ्रष्टाचारका विषयमा जानकारी गराउने उद्देश्यले विराटनगरमा जिल्लास्तरीय अन्तरक्रिया कार्यक्रम आयोजना गरिएको छ । स्थानीय जनप्रतिनिधिहरुलाई भ्रष्टाचारका विषयमा जानकारी गराउने उद्देश्यले मोरङका सबै स्थानीय तहका वडाअध्यक्षहरुको सहभागितामा जिल्लास्तरीय अन्तरक्रिया कार्यक्रम गरिएको हो ।
अख्तियार दुरुपयोग अनुसन्धान आयोग इटहरी कार्यालयको आयोजनामा भएको सो अन्तरक्रिया कार्यक्रममा आयोगले वडाध्यक्षहरुलाई भ्रष्टाचार हुनाका कारण, चुनौती, भ्रष्टाचार ठहर भएपछिका कार्बाही प्रक्रिया, नेपालमा भ्रष्टाचारको स्थिती लगायतका बारेमा कार्यपत्र प्रस्तुत गरेको थियो ।
कार्यपत्र प्रस्तुत गर्दै अख्तियार दुरुपयोग अनुसन्धान आयोग इटहरीका उपसचिव नरेन्द्रप्रसाद भट्टराईले राज्यको सार्वजनिक पद धारणा गरेको ब्यक्तिले घुस खाएको तथा सम्पत्तिको दुरुपयोग गरे तत्काल अख्तियारमा खबर गर्न आग्रह गरे ।
त्यस्तै विराटनगर महानरपालिकाकी उपमेयर इन्दिरा कार्कीले कार्यक्रमबाट आफुलाई पनि सिक्ने मौका भएको बताउँदै भ्रष्टाचार अनिवार्य राक्नुपर्नेमा जोड दिईन् ।
कार्यक्रममा जिल्ला समन्वय समिति मोरङका प्रमुख नरेश पोखरेलले जनप्रतिनिधिलाई धेरै कुरा थाहा नभएकोले कर्मचारीले झुक्याउने र जनप्रतिनिधिले जबरजस्ती काम गर्न बाध्य पार्ने कुराहरुबाट अख्तियार दुरुपयोग भएको बताए ।
उनले कर्मचारीले भ्रष्टाचार गर्न नहुने भन्दै अफिस जाँदा लगाउने सेतो कपडामा कालो दाग नलगाउन आग्रह गरे । उनले भने “सेतो लगाएर जानुभएको छ सेतै फर्किनुहोस् ।”
आयोगकी आयुक्त सावित्री थापा गुरुङले जनप्रतिनिधिबाटै जनप्रतिनिधिलाई मात्र अख्तियारले हेरेको गुनासो आउने गरेको भन्दै आयोगले कानुनले तोकेको क्षेत्रहरु अनिवार्य निगरानी गर्ने र नतोकेको क्षेत्रमा जान नमिल्ने बताईन् ।
कार्यक्रममा वडाध्यक्षहरुले आफूहरु सिक्ने क्रममा रहेको र अहिले सम्म भएका गल्तीहरु जानाजान वा अन्जानमा भएको बताएका थिए । उनीहरुले वडामा कर्मचारी अभावको समस्याले विज्ञले गर्ने काम पनि आफुले गर्नुपरेको र केही त्रुटिहरु भएको बताए ।
