एजेन्सी,असोज १५
दुई वैज्ञानिकलाई सन् २०१८ को चिकित्साशास्त्रतर्फको नोबेल पुरस्कार प्रदान गरिने नोबेल समितिले घोषणा गरेको छ । कारोलिन्स्का इन्स्टिच्यूटमा भएको नोबेल सम्मेलनले अमेरिकी वैज्ञानिक जेम्स पी. एलिसन र जापानी वैज्ञानिक तासुकु होन्जुलाई संयुक्तरुपमा सो पुरस्कार प्रदान गर्ने निर्णय गरेको हो ।
दुवै वैज्ञानिकलाई क्यान्सर रोगको उपचारका क्षेत्रमा नवीन खोजका लागि उक्त पुरस्कार दिइएको नोबेल समितिले जनाएको छ । यसैबीच, स्वीडेनको अदालतले साहित्यतर्फको नोबेल पुरस्कारका लागि मनोनयन गरिएका ७२ वर्षीय फ्रान्सेली साहित्यकार जाँ–क्लाउड आर्नाेल्टलाई बलात्कारको आरोपमा दुई वर्षको जेल सजाय सुनाएको छ ।
स्टकहोम जिल्ला अदालतले साहित्यकार आर्नाेल्ट दोषी रहेको पुष्टि भएको बताएको छ । आर्नाेल्टकी पत्नी स्वेडिस एकेडेमीको सदस्य रहेकी छन् । यही एकेडेमीले साहित्यतर्फको नोबेल पुरस्कारका विजयी घोषणा गर्दछ ।
यिनै दुईओटा विवादका कारण यस वर्ष साहित्यतर्फको नोबेल पुरस्कार नदिइने भएको छ । बलात्कारको आरोप नोभेम्बर २०१७ मा उठेको थियो । हलिउडका चर्चित व्यक्तित्व हार्भे वाइन्स्टाइनमाथि बलात्कारमा दोषी पाइएसँगै साहित्यकार आर्नाेल्टको मुद्दा सार्वजनिक भएको हो ।
स्वीडेनको दैनिक अखबार ‘डाजेन्स न्यीटर’ले आर्नाेल्टमाथि १८ जना महिलाले बलात्कार, यौनशोषण वा तनाव दिएको दाबी गरेको खबर छापेको थियो ।
