१७ चैत , काठमाण्डौ ।
सरकारले पूर्वराजा ज्ञानेन्द्र शाहको सुरक्षामा खटिएका सुरक्षाकर्मीहरु परिवर्तन गरेको छ । शाहको सुरक्षार्थ खटिएको सशस्त्र प्रहरी बलको सेट परिवर्तन गरिएको हो । डीएसपी जगदिश हमाल नेतृत्वको सुरक्षा टिमलाई फिर्ता बोलाएर नयाँ टोली खटाइएको गृह मन्त्रालयले जनाएको छ ।
पहिलेको टिमको अवधि पनि पुगेकाले नयाँ टोली खटाइएको अधिकारीहरुले बताएका छन् । अहिले सशस्त्रले डीएसपी प्रमोद पाठकको नेतृत्वमा नयाँ टिम खटाएको छ । भीभीआईपी सुरक्षा कार्यविधि अनुसार पूर्वराजाले सशस्त्र प्रहरी बलको पछुवा गाडीसहित १५ जना र नेपाल प्रहरीका दुई जना सुरक्षाकर्मी पाउँछन् ।
यद्यपि शुक्रबारको हिंसात्मक आन्दोलनपछि नेताहरुले पूर्वराजालाई दिइएको सबै सुविधाहरु खोस्नु पर्ने माग गरेका छन् । यसबीच प्रमुख राजनीतिक दलले काठमाडौंको तीनकुने क्षेत्रमा शुक्रबार भएको हिंसात्मक र अराजक घटनाको मुख्य जिम्मेवार पूर्वराजा ज्ञानेन्द्र शाह भएको निष्कर्ष निकालेका छन् ।
उनीहरूले पूर्वराजाको निर्देशनबमोजिम राजनीतिक आवरणमा भएका आपराधिक घटनामा संलग्नलाई कारबाही गर्न सरकारलाई आग्रह गरेका छन् । संविधान र गणतन्त्र पक्षधरको सर्वदलीय बैठक गरी पछिल्ला राजनीतिक घटनाको समीक्षा गर्ने तयारी पनि दलहरूले गरेका छन् ।
संसद्को पहिलो दल कांग्रेसले शुक्रबार तीनकुने घटना प्रतिगमनकारी, अराजक र आपराधिक भएको ठहरसहित यसमा पूर्वराजा ज्ञानेन्द्र शाह जिम्मेवार रहेको बताएको छ । शनिबार साँझ कांग्रेसका पदाधिकारी, पूर्वपदाधिकारी र मन्त्रीहरूको बैठकले पूर्वराजा शाहको सरकारी सुविधा खोस्नुपर्ने निष्कर्षसमेत निकालेको छ ।
यस्तै काँग्रेस नेतासमेत रहेका गृहमन्त्री रमेश लेखकले पनि घटना प्रायोजित र संगठित भएको बताएका छन् । काँग्रेसका नेताहरुले ज्ञानेन्द्रलाई सरकारले तत्कालका लागि दिएको नागार्जुन दरबार खोस्नुपर्ने पनि बताएका छन् ।
यस्तै पूर्वराजा शाहलाई राज्यले दिएको सुविधा खोस्नुपर्ने र पासपोर्ट रद्द गर्नुपर्ने सुझाव दिएका थिए । कांग्रेस सभापति शेरबहादुर देउवाले शुक्रबार राजधानीको तीनकुनेमा उपद्रो मच्चाउनेको नाइके ज्ञानेन्द्र शाह रहेको आरोप लगाएका छन् ।
काँग्रेसले आज साँझ सभापति देउवानिवास बुढानीलकण्ठमा सरकारमा रहेका र प्रतिपक्षमा रहेका गणतन्त्र पक्षधर सबै दलको बैठक बोलाएका छन् । यस्तै सरकारको नेतृत्व गरेको एमालेले पनि शुक्रबारको घटनाका निर्देशक पूर्वराजा ज्ञानेन्द्र भएको उल्लेख गर्दै संलग्न सबैलाई कानुनी दायरामा ल्याएर कारबाही गर्नुपर्ने जनाएको छ ।
उपमहासचिव प्रदीप ज्ञवालीले प्रमुख राजनीतिक दलले गैरराजनीतिक, आपराधिक घटनाको निन्दा गरेकाले आवश्यक परे संविधान र गणतन्त्रको सम्वद्र्धनका लागि दलहरू एक ठाउँमा उभिने बताए ।
उनले पत्रकारलाई जिउँदै जलाउने, सार्वजनिक तथा निजी सम्पत्तिमा आगजनी, लुटपाट गर्नेविरुद्ध सरकारले कारबाही प्रक्रिया अघि बढाएको उल्लेख गरे । त्यस्तै एमाले महासचिव शंकर पोखरेलले राजावादीको आन्दोलनका नाममा आपराधिक घटनामा संलग्न हुने र त्यसका लागि निर्देशन दिनेहरूलाई कानुनी कारबाहीको दायरामा ल्याउन माग गरेका छन् ।
माओवादीले पनि शुक्रबार भएका गैरराजनीतिक, अराजक, हिंसात्मक घटनाको सम्पूर्ण जिम्मेवार पूर्वराजा ज्ञानेन्द्र शाह भएको जनाएको छ । शनिबार राजावादीले आगजनी गरेको एकीकृत समाजवादीको पार्टी कार्यालय निरीक्षण गरेपछि माओवादी अध्यक्ष पुष्पकमल दाहालले तीनकुने क्षेत्रमा भएको घटनाको जिम्मा पूर्वराजा ज्ञानेन्द्रले लिनुपर्ने बताएका हुन् ।
घटनाको छानबिन गरी दोषीलाई कारबाहीको दायरामा ल्याउन उनले सरकारसँग माग गरेका छन् । साथै उनले संविधान र गणतन्त्रका पक्षमा शान्ति प्रक्रियाका सहयात्रीहरू एक ठाउँमा आउनुपर्नेमा पनि जोड दिए । यस्तै जनता समाजवादी पार्टी नेपालले पनि राजावादीद्वारा गरिएका हिंसात्मक घटनाको निन्दा गर्दै दोषीमाथि कारबाही गर्न माग गरेको छ ।
प्रवक्ता मनीष सुमनले विज्ञप्ति जारी गर्दै संघीय लोकतान्त्रिक गणतन्त्रात्मक प्रणालीको रक्षा र संस्थागत गर्न लाग्नुपर्ने जनाएका छन् । एकीकृत समाजवादीले घटनाको निर्देशक पूर्वराजा ज्ञानेन्द्र शाह र आयोजकहरू मुख्य जिम्मेवार भएकाले उनीहरूलाई कारबाहीको दायरामा ल्याउन सरकारसमक्ष माग गरेको छ ।
संघीय लोकतान्त्रिक व्यवस्थाविरुद्ध गैरकानुनी रूपमा धावा बोल्ने आपराधिक समूहलाई कारबाहीको दायरामा ल्याउन एकीकृत समाजवादीले सरकारसमक्ष माग गरेको छ । रास्वपाले पनि निश्चित स्वार्थ पूरा गर्ने समूहले अराजक गतिविधि गरेको निष्कर्ष निकालेको छ ।
पार्टी सचिवालय बैठकले घटनाको न्यायिक आयोग बनाएर सत्यतथ्य अनुसन्धान गर्नुपर्ने मागसमेत गरेको छ । ‘आफ्नो निश्चित स्वार्थ पूरा गर्न खोज्ने समूहले त्यो घटना गराएका छन् । उनीहरूले समाजमा विष फैलाउने काम गरेका छन्,’ रास्वपा नेता एवं संसदीय दलका प्रमुख सचेतक सन्तोष परियारले भने, ‘पूर्वराजाका नाउँमा यी घटना गराइएका छन् । यसको न्यायिक आयोग बनाएर सत्यतथ्य अनुसन्धान गर्नुपर्छ ।’
रास्वपाले लोकतन्त्रमाथि आक्रमण भएकाले सजग रहन पनि आग्रह गरेको छ । यता शुक्रबार तीनकुने क्षेत्रमा भएको हिंसा, आगजनी र तोडफोडको घटनामा पूर्वराजा ज्ञानेन्द्र शाहलाई राजनीतिक विवादमा तान्ने प्रयास नगर्न राप्रपाले आग्रह गरेको छ ।
गणतन्त्र पक्षधर दलहरूले घटनाको सम्पूर्ण जिम्मेवारी पूर्वराजा शाहकै हुनुपर्ने बताइरहँदा राप्रपाले भने उनलाई विवादमा तान्न नहुनेमा जोड दिएको हो । घटनामा मारिएका दुवैजनालाई सहिद घोषणा गर्न राप्रपाको माग छ ।
राप्रपा केन्द्रीय कार्यसम्पादन समिति बैठकपछि पत्रकारसँग कुरा गर्दै अध्यक्ष राजेन्द्र लिङ्देनले पूर्वराजालाई पक्राउ गरेर देखाउन सरकारलाई चुनौती दिएका छन् । ‘तीनकुने क्षेत्रमा भएको हिंसा, आगजनी र तोडफोडको घटनामा पूर्वराजा ज्ञानेन्द्र शाहलाई राजनीतिक विवादमा तान्ने प्रयास नगर्न आग्रह गर्छौँ,’ उनले भने, ‘न्यायिक छानबिन समिति गठन गरियोस् र हिंसा भड्काउन उद्यतलाई कारबाही होस् । उहाँ (ज्ञानेन्द्र शाह)लाई सरकारले पक्राउ गरेर देखाओस् न त, हामी चुनौती दिन्छौँ ।’
राप्रपा हिंसात्मक क्रियाकलापको विपक्षमा रहेको भन्दै उनले तीनकुने घटनामा सरकार र प्रधानमन्त्री केपी ओलीको संलग्नता रहेको आरोप लगाएका छन् । यस्तै, राप्रपाले नेताद्वय रवीन्द्र मिश्र र डा. धवलशमशेर राणा एवं अधिवक्ता स्वागत नेपाल संलग्न नभएको जिकिर गर्दै उनीहरूलाई २४ घण्टाभित्र रिहा गर्न माग गरेको छ ।
उनीहरूलाई रिहा नगरे आन्दोलन गर्ने राप्रपाको चेतावनी छ । राप्रपाले राजसंस्था पुनस्र्थापनाका लागि संयुक्त जनआन्दोलन समितिका संयोजक नवराज सुवेदीको नजरबन्द र समितिका कमान्डर तोकिएका दुर्गा प्रसाईंबारे भने बोलेको छैन ।
यता तीनकुनेमा भिड अराजक बनाउन उत्प्रेरित गर्ने राजावादी आन्दोलनका कमान्डर दुर्गा प्रसाईं अझै पक्राउ परेका छैनन् । भिडलाई अराजक बनाएर उनी कार्यक्रमस्थलबाट सुटुक्क निस्किएका थिए । काठमाडौं परिसरका प्रवक्ता एसपी अपिलराज बोहराले घटनामा १०५ जना पक्राउ परेको भए पनि प्रसाईं फरार रहेको बताएका छन् ।
