४ वैशाख , एजेन्सी ।
युरोपियन च्यामपियन्स लिग फुटबलको सेमिफाइनल समीकरण पूरा भएको छ । गएराति भएको क्वाटरफाइनलको दोस्रो लेगमा आर्सनलले रियललाई २–१ र समग्रमा ५–१ ले पराजित गर्दै अन्तिम चारमा पुग्दा अर्को खेलमा बायर्न र इन्टर मिलानले २–२ गोलको बराबरी खेलेका थिए ।
यद्यपि, पहिलो लेगमा २–१ को जितका कारण इन्टरले बायर्नलाई समग्रमा ४–३ ले पछि पार्दै सेमिफाइनलमा स्थान बनायो । पहिलो लेगमा आर्सनल ३–० ले विजयी भएको थियो । बोकायो साकाले ६५ औं मिनेटमा गोल गर्दै आर्सनललाई अग्रता दिलाए ।
तर त्यसको दुई मिनेटपछि नै भिनिसियस जुनियरले बराबरी गोल फर्काए । इन्ज्युरी समयमा मार्टिनेलीले गोल गरेपछि आर्सनलले दोस्रो लेगमा पनि जित निकाल्यो । योसँगै १५ पटकको च्याम्पियन रियल च्याम्पियन्स लिगको सेमिफाइनलबाट बाहिरिएको छ ।
जितपछि आर्सनल समग्रमा तेस्रो पटक च्याम्पियन्स लिगको सेमिफाइनल प्रवेश गर्न सफल भयो । यसअघि २००९ मा उसले सेमिफाइनलमा स्थान बनाएको थियो । पिएसजी र बार्सिलोना यसअघि नै सेमिफाइनल पुगिसकेका छन् ।
अब सेमिफाइनलमा बार्सिलोना र इन्टर तथा पिएसजी र आर्सनलबीच प्रतिस्पर्धा हुनेछ । पहिलो लेगमा आर्सनलको मैदानमा पिएसजीले ३० अप्रिलमा प्रतिस्पर्धा गर्दा दोस्रो लेग मे ८ मा पिएसजीको मैदानमा हुनेछ ।
त्यस्तै, अर्को खेलमा मे १ मा बार्सिलोनाले आफ्नो मैदानमा इन्टर मिलानको सामना गर्दा ७ मेमा इन्टरको मैदानमा दोस्रो लेग खेल्ने छ । जहाँबाट फाइनल पुग्ने टिमको तय हुने छ । प्रतियोगिताको फाइनल १ जुनमा हुनेछ ।
यसबीच किलियन एमबाप्पेले आफ्नो पहिलो सिजनमै रियल मड्रिडका साथ च्याम्पियन्स लिग जित्ने सपना अधुरै छोड्नुपरेको छ । पेरिस सेन्ट–जर्मेन (पिएसजी)बाट च्याम्पियन्स लिग जित्न उनले धेरै प्रयास गरेका थिए ।
तर, असफल भएपछि १५ पटकको च्याम्पियन रियलमा उपाधि जित्ने लक्ष्यसहित उनी आवद्ध भए । यद्यपि, उनले रियललाई उपाधिनजिक पु¥याउन सकेनन् । स्यान्टियागो बर्नाबेउमा बुधबार सम्पन्न दोस्रो लेगमा केही समर्थकहरूले उनलाई ‘हूट’समेत गरे ।
एमबाप्पे पछिल्ला पाँच खेलमा कुनै गोल गर्न सकेका छैनन् । बुधबारको खेलमा उनले एकपटक पनि पोस्टतर्फ बल प्रहार गर्न सकेनन् । ७५औं मिनेटमा दाहिने खुट्टाको चोट बोकेपछि उनी मैदानबाट बाहिरिएका थिए ।
ब्राहिम डियाजले उनलाई प्रतिस्थापन गरे । दर्शकहरूले उनको नाम घोषणामा ‘हूट’ गरेका थिए । यद्यपि, उनले आफैं हिंडेर मैदान छोडेका थिए । क्लबले चोटको गम्भीरताबारे तत्काल कुनै जानकारी दिएको छैन ।
२३औं मिनेटमा एमबाप्पेमाथि पेनाल्टीको सम्भावना देखिएको थियो । तर, भिएआरको समीक्षापछि निर्णय उल्ट्याइयो । रेफ्रीले पहिला डिफेन्डरले उनलाई समातेको भन्दै पेनाल्टी दिएका थिए ।
रियलका गोलरक्षक थिबाउट कोर्टोइसले आर्सनलको सशक्त रक्षात्मक रणनीतिले एमबाप्पे र भिनिसियस जुनियरलाई प्रभावहीन बनाएको बताए । ‘कहिलेकाहीँ हामीले आत्मआलोचना गर्न पनि सक्नुपर्छ । हामी एउटा समूह हौं,’ उनले भनेका छन् ।
