२ जेठ ,एजेन्सी ।
करिम बेन्जेमाको कप्तानीमा अल इत्तिहादले साउदी प्रो लिगमा र क्याटालन क्लब बार्सिलोनाले फेरि एकपटक स्पेनिस फुटबलमा आफ्नो
प्रभुत्व कायम राखेका छन् ।
दुई फरक महादेशका दुई विशाल क्लबहरूले आ–आफ्नो लिगमा विजय झण्डा फहराउँदै, समर्थकहरूलाई गौरव, उत्साह र खुसीको अनुभूति दिलाएका छन् ।
करिम बेन्जेमाको कप्तानीमा रहेको अल इत्तिहादले साउदी प्रो लिगको उपाधि जितेको छ । अल इत्तिहादले बिहीबार राति अल–राइदविरुद्ध ३–१ को जित निकालेसँगै प्रो लिगको उपाधि निश्चित गरेको हो ।
अल–इत्तिहादलाई जित दिलाउन स्टेभन बेर्जविन, ड्यानिलो पेरेरा र अब्दुलरहिम अलोबुदले गोल गरे । अल–राइदका ओउमार गोन्जालेजले एक गोल गरेका थिए ।
नवौँ मिनेटमा गोन्जालेजको गोलमा राइदले अग्रता बनाएको थियो । २१औँ मिनेटमा बेर्जविनको गोलमा इत्तिहाद खेलमा फर्कियो । ४०औँ मिनेटमा पेरेराले गोल गरेपछि इत्तिहादले पहिलो हाफमा २–० को अग्रता बनाएको थियो ।
४७औँ मिनेटमा अलोबुदले गोल गरेसँगै इत्तिहादले ३–१ को जित पक्का गरेको हो । प्रो लिगको इतिहासमा इत्तिहाद १०औँपटक च्याम्पियन बनेको हो ।
इत्तिहादले पछिल्लोपटक सन् २०२३ मा प्रो लिगको उपाधि जितेको थियो । जितसँगै अल–इत्तिहादले ३२ खेलबाट ७७ अंक जोडेको छ । त्यो दोस्रो स्थानको अल–हिलालको भन्दा नौ अंक धेरै हो ।
प्रो लिगमा अब अन्तिम दुई चरणका खेल बाँकी छ । अल हिलालले ३१ खेलबाट ६८ अंक जोडेको छ । अल–इत्तिहादसँग पराजित अल–राइद २१ अंकसहित तालिकाको पुछारमा छ ।
यस्तै क्याटालन क्लब बार्सिलोनाले २८औँपटक स्पेनिस ला लिगाको उपाधि जितेको छ । बिहीबार राति ‘सहरिया प्रतिद्वन्द्वी’ स्पान्योलविरुद्ध २–० को जित निकालेसँगै बार्सिलोना दुई खेलअगावै ला लिगा च्याम्पियन बनेको हो ।
यो जितसँगै बार्सिलोनाले दोस्रो स्थानको रियाल मड्रिडसँग सात अंकको अग्रता बनाएको छ । रियालविरुद्ध यसअघिको खेलमा ४–३ को जित निकालेसँगै बार्सिलोना उपाधि होडमा बलियो बनेको थियो ।
बिहीबारको खेलमा बार्सिलोनालाई जित दिलाउन लामिन यमल र फेर्मिन लोपेजले गोल गरे । बार्सिलोनाले दुवै गोल दोस्रो हाफमा गरेको हो । यमलले ५३औँ मिनेटमा गोल गर्दै बार्सिलोनालाई अग्रतामा राखेका थिए ।
इन्ज्युरी समयमा लोपेजले अर्को गोल थपे । खेलको ८०औँ मिनेटमा लियान्ड्रो काब्रेराले रातो कार्डको दर्शन गर्दै मैदान छाडेपछि स्पान्योल १० खेलाडीमा समेटिएको थियो ।
जितसँगै बार्सिलोनाले ३६ खेलबाट ८५ अंक जोडेको छ । त्यो ला लिगाको अन्तिम दुई खेल बाँकी हुँदा दोस्रो स्थानको रियालभन्दा दुई अंक धेरै हो ।
समान खेलबाट रियालको ७८ अंक छ । ३६ खेलबाट ३९ अंक जोडेको स्पान्योल भने तालिकाको १६औँ स्थानमा छ ।
