५ असोज , काठमाण्डौ ।
जेनजी आन्दोलनपछि सरकारमा र संसदमा पनि हैसियत गुमाएका दलहरु अहिले पुनर्गठन गर्ने कि यथास्थितिमै रहने भन्ने विवादमा फसेका छन् । पार्टीका संस्थापन पक्ष अहिले केही नचलाउने भन्नेमा जोड दिइरहँदा इतर र विशेषगरी युवापुस्ताकाले भने व्यापक परिवर्तनको माग गरिरहेका छन् ।
उनीहरुले जेनजी आन्दोलनको मर्म अनुसार युवालाई नेतृत्व हस्तान्तरणको माग गरिरहेका छन् । भदौ २३, २४ को घटनापछि यो माग सबैभन्दा पहिला र बढी नेपाली काँग्रेसमा उठ्यो । महामन्त्रीद्वयले विशेष महाधिवेश आह्वान गरेर पार्टी पुनर्गठन गर्न प्रस्ताव गरे ।
गगनकुमार थापाले शनिबार रातिमात्रै एक भिडियो संदेश जारी गर्दै पार्टीको व्यापक पुनर्गठनका निम्ति दुईवटा बाटो देखाएका छन् । पहिलो विकल्पमा पुरानो क्रियाशील सदस्यता नवीकरण, एकरदुई महिनाका लागि नयाँ क्रियाशील सदस्यता खोलेर विधानको सबै धारा निलम्बन गर्ने र पार्टीको सदस्यहरूबाट सिधा चुनाव गरेर पार्टीको नेतृत्व छान्ने अरु गर्दै जान सकिने प्रस्ताव गरेका छन् ।
यस्तै अर्को विकल्पमा विशेष महाधिवेशन गर्नुपर्ने उनले सुझाएका छन् । तर काँग्रेसले यसलाई स्वीकार गर्न सकेको छैन । आजै देउवा पक्षका नेताहरुले पार्टीमा किचलो निम्त्याउने भन्दै विशेष महाधिवेशन नै गर्न नहुने निश्कर्ष निकालेका छन् ।
यता गगनको प्रस्ताव माओवादी अध्यक्ष पुष्पकमल दाहालले भने आफ्नो पार्टीभित्र लागू गराएका छन् । उनले गगनले भनेजस्तै गरी मंसिरमै विशेष महाधिवेशन गरेर नयाँ नेतृत्वमा चयन गर्ने प्रस्ताव गरेका छन् । दाहालले केन्द्रीय पदाधिकारीको बैठकमा केन्द्रदेखि जिल्लासम्मका सबै पार्टीका संगठनिक संरचनाहरू भत्काएर भत्काएर नयाँ संरचना बनाउनुपर्ने बताएका छन् ।
महाधिवेशनले नै खुला लोकतान्त्रिक ढंगले पार्टीको नेतृत्व चयन गर्ने उनको प्रस्ताव छ । उनले केन्द्रीय पदाधिकारी बैठकमा घोषित निर्वाचनमा होमिनुको विकल्प नभएको भन्दै निर्वाचनको तयारीमा लाग्नुपर्ने प्रस्ताव पेस गरेका छन्। अब निर्वाचनमै जान उपयुक्त हुने पनि दाहालको भनाइ छ ।
उक्त प्रस्ताव पदाधिकारी बैठकबाट पारित भएर केन्द्रीय कमिटीमा जाने छ । केन्द्रीय कमिटी बैठकले यस सम्बन्धी औपचारिक निर्णय गर्ने एक पदाधिकारीले बताए । प्रचण्डले केन्द्रीय समिति बैठक पनि एक हप्ताभित्रै बोलाउने बताएका छन् ।
उपमहासचिव जनार्दन शर्मा प्रभाकर पक्षले अहिलेको नीति र नेतृत्वबाट पार्टी नचल्ने भन्दै विशेष महाधिवेशन माग गर्दै आएको छ । जेनजी युवा आन्दोलनपछि यो माग अझ बढी चर्को भएको छ। उपमहासचिव शर्माले प्रचण्डले राजीनामा दिएर नयाँ नेतृत्वका लागि बाटो खोलिदिनुपर्ने बताएका छन् ।
यता केन्द्रीय समितिलाई महाधिवेशन आयोजक समितिमा रूपान्तरण गर्दै अध्यक्ष प्रचण्ड संयोजक बनेका छन् । पदाधिकारीसहित केन्द्रीय समिति सदस्य महाधिवेशन आयोजक समिति सदस्यमा रूपान्तरित भएका छन् । २०७८ पुस ११ देखि १८ गतेसम्म चलेको महाधिवेशनले ६ महिनाभित्र विशेष महाधिवेशन गर्ने निर्णय गरेको थियो ।
यसअघि माओवादी केन्द्रभित्र विशेष महाधिवेशनबारे बहस उठे पनि अध्यक्ष प्रचण्डले त्यसमा रूचि देखाएका थिएनन् । उपमहासचिव जनार्दन शर्माले केही समयदेखि विशेष महाधिवेशनको आवाज उठाउँदै आएका थिए । पार्टीहरू रूपान्तरण हुनुपर्ने बहस चलेका बेला माओवादीले विशेष महाधिवेशन गर्ने प्रस्ताव अघि सारेको छ ।
यता नेपाली कांग्रेसका पाँचजना पूर्वपदाधिकारीले भने विशेष महाधिवेशन गर्दा पार्टीमा कलह उत्पन्न हुने भन्दै नियमित महाधिवेशन गर्नुपर्ने बताएका छन् । पार्टीको १५ औँ महाधिवेशन आगामी मंसिरमा गर्नुपर्ने भए पनि महामन्त्री गगन थापा नेतृत्वको क्रियाशील सदस्यता व्यवस्थापन समितिले समयमै काम नगर्दा समस्या देखिएको उनीहरूको निष्कर्ष छ ।
आइतबार पूर्वमहामन्त्री प्रकाशमान सिंह निवास चाक्सीबारीमा पूर्वमहामन्त्रीहरू सिंह, कृष्णप्रसाद सिटौला र डा. शशांक कोइराला तथा पूर्वउपसभापति विमलेन्द्र निधि र पूर्वसहमहामन्त्री डा. प्रकाशशरण महतले छलफल गरेका हुन् ।
उनीहरुको बैठकले शुक्रबारको कार्यसम्पादन समिति बैठकमा महामन्त्रीद्वय गगन थापा र विश्वप्रकाश शर्माले वर्तमान परिस्थितिमा पार्टीलाई अगाडि बढाउन विशेष महाधिवेशन गरी नयाँ नेतृत्व चयन गर्न गरेको प्रस्तावले पार्टीमा कलह निम्त्याउने निष्कर्ष निकालेको हो ।
महामन्त्रीद्वय थापा र शर्माको प्रस्ताव कार्यसम्पादन समिति बैठकले नै अस्वीकार गरिसकेको छ । महामन्त्रीद्वय थापा र शर्माले वर्तमान परिस्थितिमा पार्टीलाई जोगाउन विशेष महाधिवेशन गरी नेतृत्व परिवर्तन गर्नुपर्ने प्रस्ताव राखेका थिए ।
माओवादीले विशेष महाधिवेशन सहित पार्टी पुनर्गठनका लागि सबैभन्दा अगाडी निर्णय गर्दा अन्य दलहरू कांग्रेस, एमाले र मात्र होइन, राष्ट्रिय स्वतन्त्र पार्टीमा समेत पार्टी पुनर्गठनको उपयुक्त समय आएको भनेर एक पक्षले भनिरहे पनि अर्को पक्षले यस्तो बेला नेतृत्व परिवर्तन र पार्टी पुनर्गठनले पार्टी थप कमजोर हुने बताइरहेको छ ।
यसबाहेक नागरिक उन्मुक्ति पार्टी, जनमतमा समेत पार्टी पुनर्गठन हुनुपर्ने आवाज चर्को बनेको छ । नेकपा एमालेका प्रचार विभाग प्रमुख राजेन्द्र गौतम पनि यतिवेला पार्टी पुनर्गठन र नेतृत्व परिवर्तनको सडकबाट भइरहेको बहसलाई बेमौसमको बाजाको संज्ञा दिँदै पार्टी नेतृत्वमाथिको हमलाका रूपमा बुझ्नुपर्ने तर्क गर्छन् ।
उनले पार्टीको आन्तरिक छलफल र बहसको विषय सडकबाट उठाइनु अनुचित भएको समेत बताएका छन् । खासमा अहिले सरकारले के गर्दैछ भनेर एमाले लगायतका दलहरूले मसिनो ढंगले नियालिरहेका गौतमको भनाइ छ ।
