१२ असोज, काठमाण्डौ ।
भारतको दक्षिणी राज्य तमिलनाडुमा आयोजित एक राजनीतिक ¥यालीमा भागदौड मच्चिँदा बालबालिकासहित कम्तीमा ३९ जनाको मृत्यु भएको त्यहाँका अधिकारीहरूले बताएका छन् ।
अभिनेताबाट राजनीतिज्ञ बनेका थलापति विजयको प्रचार कार्यक्रममा शनिबार दक्षिणी करुर जिल्लामा हजारौँ मानिस भेला भएका थिए । स्थानीय सञ्चारमाध्यमका अनुसार, यो कार्यक्रम धेरै घण्टा ढिलो भएको थियो ।
टेलिभिजनमा प्रसारित फुटेजमा खचाखच भीडमा मानिस मूर्छा परेको देखाइएको थियो । राजनीतिज्ञ सेन्थिल बालाजीले स्थानीय अस्पतालबाहिर पत्रकारलाई मृत्युको पुष्टि गर्दै १०० भन्दा बढी मानिस घाइते भएका बताएका थिए ।
राज्यका स्वास्थ्यमन्त्री एम सुब्रमण्यनले स्थानीय सञ्चारमाध्यमलाई जानकारी दिँदै मृत्यु हुनेमा १० बालबालिका र १६ महिलासहित थिए । अहिलेसम्म ३४ जनाको शव पहिचान भइसकेको छ ।
तमिलनाडुका मुख्यमन्त्री एमके स्टालिनले भागदौडमा मूर्छा परेपछि केही मानिसलाई अस्पताल पु¥याइएको बताए । स्टालिनले मृतकका परिवारलाई १०÷१० लाख भारु क्षतिपूर्ति प्रदान र घटनाको जाँचबुझ गरिने जानकारी दिए ।
अभिनेता विजयले अनलाइन बयान जारी गर्दै घटनाबाट आफ्नो मुटु टुक्रेको र असहनीय पीडा र दुःखमा रहेको बताएका छन् । उनले मृत्यु भएकाहरूको परिवारप्रति गहिरो सहानुभूति र समवेदना व्यक्त गर्दै अस्पतालमा रहेकाको शीघ्र स्वास्थ्यलाभका निम्ति प्रार्थना गरेका छन् ।
भारतका प्रधानमन्त्री नरेन्द्र मोदीले सामाजिक सञ्जाल एक्समा एक पोस्टमार्फत घटनालाई दुर्भाग्यपूर्ण र अत्यन्तै दुःखद भनेका छन् ।
विजयले आफ्नो ¥यालीका क्रममा भएको दुर्घटनामा मृत्यु भएका र घाइते भएका परिवारलाई आर्थिक सहयोगको घोषणा गरेका छन् ।
विजयले इन्स्टाग्राममा पोस्ट गर्दै दुर्घटनामा प्रियजन गुमाउने प्रत्येक परिवारलाई २० लाख रुपैयाँ सहयोग गर्ने बताएका छन्। उनले उपचाररत घाइतेहरूका लागि २ लाख रुपैयाँ सहयोगको घोषणा पनि गरेका छन् ।
यस दुःखद घटनाप्रति समवेदना व्यक्त गर्दै उनले लेखेका छन्, ’ठूलो क्षतिलाई विचार गर्दा यो रकम नगण्य छ। यद्यपि, यस समयमा, तपाईंको परिवारको सदस्यको रूपमा, तपाईंसँगै उभिनु मेरो कर्तव्य हो।’
यता चेन्नईमा रहेको अभिनेता नेता विजयको घरमा सुरक्षा बढाइएको छ । जनतामा आक्रोश रहेकाले विजयको घर वरपर सुरक्षा बलियो बनाइएको हो ।
विजयको दल टीभीकेले सन् २०२६ मा हुने विधानसभा निर्वाचनमा उम्मेदवारी दिन लागेको छ । त्यसैको पूर्वतयारी स्वरूप विजयले विभिन्न स्थानमा आमसभा आयोजना गरिरहेका छन् ।
तमिलनाडुको डीएमके सरकारले विजयलाई आमसभाको निर्देशिका पालन नगरेकाले भागदौड भएर मानिसहरूको मृत्यु भएको भन्दै आलोचना गरेको छ ।
आयोजकहरूले खाना र पानीको यथोचित प्रबन्ध नमिलाएकाले भीडमा मानिसहरू बेहोश भएको सरकारको भनाइ छ । उक्त आमसभामा विजय ७ घन्टा ढिलो पुगेका थिए ।
कार्यक्रम स्थलमा मानिसहरू मध्याह्नमै पुगिसकेका थिए । तर, विजय साँझ ७ बजेपछि मात्र त्यहाँ पुगेका थिए । पहिल्यै भीडभाड भएको ठाउँमा विजय आफैं भीड लिएर पुगेका थिए ।
विजयले सम्बोधन गरिरहँदा कतिपय मानिस बेहोश भएर ढलेका थिए । तर, उनले भाषण गरिरहे र कार्यक्रम स्थलमा एम्बुलेन्स आउन दिइएन ।
आमसभा सकिएपछि विजय त्रिची विमानस्थल पुगेर निजी विमानमा चेन्नई पुगेका थिए । टीभीकेका एक प्रवक्ताले आमसभामा सबै निर्देशिका पालन गरिएको बताए ।
यस त्रासदीले विजयलाई ठूलो चोट पुगेको र उनी तमिलनाडुका मानिसलाई मन पराउने ती प्रवक्ताले बताए । विजयले भीडमा मानिसहरूलाई पानीको बोतल दिएको भिडियो पनि सार्वजनिक भएको छ ।
भारतको तमिलनाडुमा अभिनेता–राजनीतिज्ञ विजय थलापतिको ¥यालीमा भागदौड हुँदा बालबालिकासहित ३९ जनाको मृत्यु र सयभन्दा बढी घाइते ।
ढिलो सुरु भएको कार्यक्रममा भीड नियन्त्रण नहुँदा त्रासदी, मृतक परिवारलाई क्षतिपूर्ति घोषणा, प्रधानमन्त्री मोदीदेखि मुख्यमन्त्री स्टालिनसम्मको दुःख प्रकट, विजयको घर वरिपरि सुरक्षा कडा ।
