२६ असोज ,काठमाण्डौ ।
आईसीसी विश्वकप एयिसा–प्यासिफिक क्षेत्रीय फाइनलको सुपर–६ का खेल आजबाट ओमानमा सुरु हुँदैछन् । नेपालले आज चिरप्रतिस्पर्धी युनाइटेड अरब इमिरेट्स (यूएई)विरुद्ध प्रतिस्पर्धा गर्दै छ ।
ओमानको अल अमिरेत क्रिकेट रंगशालामा यो खेल नेपाली समयानुसार अपराह्न ४ः१५ बजे सुरु हुनेछ । आजको खेल नै विश्वकप छनोटका लागि नेपालका लागि निजर्णायक मानिएको छ।
जारी छनोटमा यूएई नै नेपालका लागि प्रमुख चुनौती मानिएको छ । प्रतियोगितामा नेपाल समूह ‘बी’का दुवै खेल जित्दै सुपर–६ मा २ अंक जोड्दै आएको हो । नेपालले समूह चरणको पहिलो खेलमा कुवेतलाई ५८ रनले हराएको थियो ।
यस्तै दोस्रो खेलमा जापानविरुद्ध पाँच विकेटको जित निकालेको थियो । यूएईविरुद्ध प्रतिस्पर्धामा उत्रँदा नेपाल लगातार तेस्रो जितको खोजीमा हुनेछ । यस्तै यूएई पनि समूह चरणका दुवै खेलमा जितसहित सुपर–६ मा आएको हो ।
समूह ‘ए’मा यूएईले कतारलाई सात विकेटले हराएको थियो । यूएईले मलेसियाविरुद्ध ६ विकेटको जित निकालेको थियो ।नेपालले सुपर–६ मा रहेका पाँचमध्ये चार टिमसँग प्रतिस्पर्धा गर्नेछ ।
नेपालले प्रतिस्पर्धा गर्ने टिममा यूएईसँगै कतार, ओमान र समाओ छन् । जसमध्ये बलियो टोलीका रुपमा यूएईलाई हेरिएको छ। नेपालले आफ्नै समूहबाट सुपर–६ मा आएको जापानविरुद्ध भने प्रतिस्पर्धा गर्ने छैन ।
सुपर–६ मा नेपालले यी चार टिमविरुद्ध ‘डबल राउन्ड रोबिन’ पद्धतिअनुसार प्रतिस्पर्धा गर्नेछ । विश्वकपको यो छनोट प्रतियोगितामा एसिया र प्यासिफिक क्षेत्रका कुल नौ टिमको सहभागिता थियो ।
यसबाट तीन टिमले मात्र आउँदो वर्ष भारत र श्रीलंकामा हुने विश्वकपमा स्थान बनाउनेछन् । नौलाई प्रत्येकमा तीन टिम रहने गरी तीन समूहमा विभाजन गरिएको थियो । त्यहाँबाट प्रत्येक समूहका शीर्ष दुई टिम सुपर–६ मा छनोट भएका हुन् ।
सुपर–६ को शीर्ष तीनमा रहने टिमले विश्वकपमा स्थान बनाउनेछन् । यसअघि टी–२० विश्वकप खेलिसकेको पपुवा न्यु गिनीसँगै कुवेत र मलेसिया भने पहिलो चरणबाटै बाहिरिएका छन् ।
छनोटअघि नेपालले तयारीस्वरूप टेस्ट राष्ट्र तथा दुईपटकको ट्वान्टी–२० विश्वकप विजेता वेस्ट इन्डिजसँग तीन खेलको शृंखला खेलेको थियो । यूएईमा भएको उक्त शृंखलामा नेपालले २–१ को ऐतिहासिक जित निकालेको थियो ।
ओमानमै भएको छनोटअघिको अभ्यास खेलमा नेपालले शतप्रतिशत जित निकालेको थियो । अभ्यास खेलमा नेपालले ओमानलाई ६ विकेटले हराएको थियो । नेपालले कतारविरुद्ध १६ रनको जित निकालेको थियो ।
नेपाली क्रिकेट टिमले हालसम्म दुईपटक मात्र ट्वान्टी–२० विश्वकपमा प्रतिस्पर्धा गरेको छ । नेपालले पहिलोपटक सन् २०१४ मा बंगलादेशमा आयोजित विश्वकपमा प्रतिस्पर्धा गरेको थियो ।
त्यति बेला नेपाली टिम नेपाल क्रिकेट संघ (क्यान)का हालका सचिव पारस खड्काको कप्तानीमा प्रतिस्पर्धामा उत्रिएको थियो । त्यसपछि नेपालले गत वर्ष अमेरिका र वेस्ट इन्डिजमा आयोजित ट्वान्टी–२० विश्वकपमा प्रतिस्पर्धा गरेको थियो ।
विश्वकपको यो संस्करणमा नेपाली टिमको नेतृत्व रोहित पौडेलले गरेका थिए । गतवर्षको विश्वकपको यात्रा नेपालले यूएईलाई नै पाखा लगाएर तय गरेको थियो । समूह चरणमा सामोआले पपुवा न्यु गिनीलाई हराउनु, कतारले मलेसियालाई हराउनु अनि जापानले कुवेतलाई हराउनु केही सरप्राइज नतिजाको रुपमा आयो ।
त्यसैले सुपर सिक्सका खेलहरु अझ रोमाञ्चक र प्रतिस्पर्धात्मक हुने अपेक्षा गर्न सकिन्छ । नेपालले समूह चरणमा तुलनात्मक रुपमा कमजोर टोलीसँग खेलेको थियो । सुपर सिक्समा अझ बलिया टोली हुने भएकोले पनि अब नेपालका लागि मुख्य चुनौती सुपर सिक्समा हुनेछ ।
समूह चरणमा अपराजित रहेका नेपाल, युएई र ओमानसँग सुपर सिक्समा खेल्नुअघि नै २–२ अंक हुनेछ । बाँकी तीन टिमसँग कुनै अंक हुने छैन । यस्तोमा यी तीन टिमलाई २ अंकको फाइदा छ ।
सुपर सिक्समा नेपालले समूह ए बाट आएका युएई र कतार तथा समूह सी बाट आएका ओमान र सामोअसँग प्रतिस्पर्धा गर्नेछ । युएई र ओमान नेपालका लागि चिरपरचिति प्रतिद्वन्दी हुन् ।
यस्तै कतारसँग पनि नेपालले यसअघि खेलिसकेको छ । यस्तै दोस्रो खेल सोमबार कतारसँग खेल्नेछ । त्यसपछि नेपालले तेस्रो खेल ओमानसँग बुधबार खेल्नेछ भने सुपर सिक्सको अन्तिम खेल शुक्रबार सामोआसँग खेल्नेछ ।
यी चार खेलको नतिजापछि नेपालले टी–२० विश्वकपमा स्थान बनाउने÷नबनाउने टुङ्गो लाग्नेछ । अबको एक साताभित्रै टी–२० विश्वकप पुग्ने तीनवटै टिमको टुङ्गो लाग्नेछ।
आजको खेलमा जित हारको नतिजाले पनि नेपालको आगामी खेलमा प्रभाव पार्न सक्छ ।
त्यसैले सुरुमा नेपाली टिमको पहिलो प्राथमिकता भनेकै युएई विरुद्ध जित निकाल्ने हुनेछ । ओमानी मैदानमा नेपालको नतिजा खासै राम्रो छैन । त्यसमा पनि युएईविरुद्ध नेपालको विगतमा राम्रो छैन ।
नेपालले युएईसँग ओमानमा खेलेको तीनवटै टी–२० अन्तर्राष्ट्रिय खेलमा हार व्यहोरेको छ । सन् २०२२ मा ओमानमै भएको टी–२० विश्वकप छनोटमा नेपाल यूएईसँग पराजित हुँदा विश्वकपमा छनोट हुन असफल भएको थियो ।
त्यस बेला सेमिफाइनलमा नेपाल यूएईसँग ६८ रनले पराजित भएको थियो । त्यसअघि भएको चार देशीय सिरिजमा नेपाल युएईसँग २५ रनले पराजित भएको थियो । यस्तै पछिल्लो पटक सन् २०२४ मा भएको एसीसी प्रिमियर कपको सेमिफाइनलमा पनि नेपाल यूएईसँगै पराजित भएको थियो ।
एसिया कपको छनोटको रुपमा समेत रहेको उक्त सेमिफाइनलमा नेपाल यूएईसँग ६ विकेटले पराजित भएको थियो । जापानलाई हराएपछि कप्तान रोहितले पनि यूएई पनि राम्रो टिम भएको तर एक विपक्षी टिमकै रुपमा लिने बताएका छन् । ।
‘यूएई यो टुर्नामेन्टको बेस्ट टिममध्ये एक हो । हामी विपक्षीको रुपमा हेरेका छौं । यदि हामीले हाम्रो बेसिक र स्ट्यानडर्ड अनुसार खेल्यौं भने हामीले जित्न सक्छौं’ रोहितले भने, ‘मुख्य कुरा हामी विपक्षी को छ भन्दा पनि आफ्नो स्ट्रेन्थमा फोकस गर्नेछौं ।’
यस पटक नेपाली टिमको लय राम्रो रहेको र टिम सन्तुलित रहेकोले यूएईसँग हराउन सक्ने विश्वास छ । तर वास्तविक परिक्षा भने आज ओमानको मैदानमा देखिनेछ ।
