काठमाडौं ,असोज २०
विभागीय नेपाल एपिएफ क्लबकी कान्छी माया कोजुले म्याराथनमा नयाँ राष्ट्रिय कीर्तिमान बनाएकी छिन् ।उनले निर्धारित दुरी २ घन्टा ५० मिनेट ४१ सेकेन्डमा पुरा गर्दै दुई वर्ष अघि आफ्नै नाममा रहेको कीर्तिमान भंग गरेकी हुन् ।
१२औं संस्करणको काठमाडौं म्याराथन अन्तरगत शनिबार बिहान भएको म्याराथनमा कान्छीले ५ मिनेट १७ सेकेन्ड समय सुधार गरेकी हुन् ।उनले २०७३ को काठमाडौं म्याराथनमा २ घन्टा ५५ मिनेट ५८ सेकेडसहित कीर्तिमान बनाएकी थिईन् ।
काठमाडौं म्याराथनको च्याम्पियन बनेसँगै कान्छीले १३औं साग र आठौं राष्ट्रिय खेलकुद नजिकिदै गरेको अवस्थामा बीचमा आएको प्रतियोगिताले नाफा भएको बताइन् । उपाधिसँगै कान्छीले ५० हजार र शिल्ड प्राप्त गरिन् ।
आर्मीकी सरिता वासीले ३ घन्टा ११ मिनेट १४ सेकेन्डमा दुरी पुरा गर्दै दोस्रो स्थान हात पारिन् भने राजपुरा पचहाईले ३ घन्टा २४ मिनेट ८ सेकेन्डमा दुरी पुरा गर्दै तेस्रो स्थान हात पारिन् । दोस्रो भएकी सरिताले २० हजार र राजपुराले १५ हजार रुपैया प्राप्त गरिन् ।
