विराटनगर,असोज २३
प्रदेश १ स्तरीय दोस्रो भेट्रान फुटबल प्रतियोगिताको आज भएको खेलमा झापाको काँकडभिट्टा भेट्रान क्लब विजयी हुँदै सेमिफाइनलमा प्रवेश गरेको छ ।
विराटनगरको सहिद रंगशालामा भएको नेपालकै सर्वाधिक राशिको भेट्रान फुटबल प्रतियागितामा काँकरभिट्टाले मोरङ कानेपोखरीको एभरेष्ट भेट्रानलाई ५–१ को फराकिलो गोल अन्तरमा पराजित गरी सेमिफाइनलमा प्रवेश गरेको हो ।
काँकडभट्टाबाट खेलेका क्रिकेटका पूर्व राष्ट्रिय खेलाडी लाक्पा लामाले ४ गोल गरे भने रमेशकुमार बस्नेत १ गोल गर्दै टिमलाई विजयी बनाए । एभरेष्टका लागि एकमात्र सान्तवना गोल कुमुदकुमार लिम्बूले गरे ।
दुवै टिमबाट ‘ए’ डिभिजनका अनुभवी खेलाडीहरुको सहभागिता रहेको थियो । खेलको तेस्रो मिनेटमा एभरेष्टका कुमुदकुमार लिम्बूले बक्सभित्र मिलाइ दिएको पासमा छत्र लिम्बू गोल गर्न चुके ।
खेलको म्यान अफ द म्याच काँकडभिट्टाका लाक्पा लामा भए । असोज २७ गतेसम्म हुने प्रतियोगिताको भोलिको पहिलो सेमिफाइनल खेल झापा दमकको पूर्वाञ्चल र सुनसरीको धरान भेट्रान क्लबबीच हुनेछ ।
प्रतियोगिताको विजेताले नगद १ लाख ५१ हजार रुपैयाँ र उपविजेताले नगद ७५ हजार रुपैयाँका साथै ट्रफी जित्ने छन् ।
