विराटनगर,असोज २३
प्रदेश १ का १९ वटा स्थानीय तहमा बैंक तथा वित्तीय संस्थाको पहुँच पुग्न बाँकी रहेको छ । सबै स्थानीय तहमा बैंकको शाखा खोल्न राष्ट्र बैंकले निर्देशन दिए पनि प्रदेश १ का १३७ स्थानीय तहमध्ये अझै १९ वटा स्थानीय तहमा बैंकको शाखा विस्तार हुन नसकेको हो ।
नेपाल राष्ट्र बैंक अनुसन्धान विभागका कायममुकायम निर्देशक हिमप्रसाद न्यौपानेका अनुसार ११८ वटा स्थानीय तहमा बैंकको शाखा विस्तार भएको छ । २०७४ असार मसान्तसम्म १३७ मध्ये ५८ वटा स्थानीय तहमा मात्र बैंकका शाखा विस्तार भएका थिए ।
तर चालु आर्थिक वर्षको असोजसम्म ६० वटा स्थानीय तहमा नयाँ शाखा स्थापना भएका छन् । आज नेपाल राष्ट्र बैंकले आयोजना गरेको संघीय संरचनामा आर्थिक गतिविधि अध्ययनसम्बन्धी अन्तरक्रिया कार्यक्रममा कार्यपत्र प्रस्तुत गर्दै निर्देशक न्यौपानेले ३ वटाबाहेक अन्य स्थानीय तहमा बैंक स्थापनाका लागि प्रक्रिया सुरु भएको छ ।
३ वटा स्थानीय तहमा भने भौगोलिक समस्याका कारण बैंकको शाखा खोल्ने कार्य सुरु भएको छैन । १ सय १८ स्थानीय तहमा बैंकको शाखा विस्तार भए पनि सबै मानिसको बैंक खाता भने छैन ।
