२६ साउन , काठमाण्डौ ।
देशभर अहिले मनसुनी वायुको प्रभाव व्यापक रूपमा रहेको मौसम पूर्वानुमान महाशाखाले जनाएको छ। हाल मनसुनको न्यून चापीय रेखा नेपालको पश्चिम भूभागमा सरदरभन्दा केही उत्तरतर्फ अर्थात् नेपालको नजिक अवस्थित रहेको छ भने पूर्वी भूभागमा भने यो रेखा सरदर स्थानको आसपास रहेको छ ।
यसको प्रत्यक्ष प्रभावस्वरुप हाल देशका अधिकांश भूभागमा मौसम बदली भएको छ। मौसम विज्ञान विभागबाट प्राप्त पछिल्लो विवरण अनुसार, लुम्बिनी, कर्णाली र सुदूरपश्चिम प्रदेशका अधिकांश भूभागमा बाक्लो बादल लागेको छ।
यस्तै, कोशी, बागमती र गण्डकी प्रदेशमा साधारणतया बादल लागेको छ भने मधेस प्रदेशमा आंशिक बदली मात्रै देखिएको छ। अहिलेको यो मौसमी प्रणालीका कारण देशका धेरैजसो स्थानमा पानी पर्न थालिसकेको छ।
प्राप्त जानकारी अनुसार लुम्बिनी प्रदेशका केही स्थानहरूमा तथा कोशी, बागमती, गण्डकी, कर्णाली र सुदूरपश्चिम प्रदेशका थोरै स्थानहरूमा हल्कादेखि मध्यम किसिमको वर्षा भइरहेको छ। आज दिउँसो देशका विभिन्न क्षेत्रमा वर्षाको सम्भावना अझै कायमै रहने बताइएको छ।
दिउँसोको समयमा गण्डकी, लुम्बिनी, कर्णाली र सुदूरपश्चिम प्रदेशका साथै कोशी र बागमती प्रदेशको हिमाली र पहाडी भूभागमा साधारणतया बदली रहनेछ भने मधेस प्रदेश र कोशी तथा बागमती प्रदेशको तराई भूभागमा आंशिक बदली रहनेछ।
देशका हिमाली भूभागका केही स्थानमा चट्याङ्गसहित मध्यम वर्षाको सम्भावना रहेको छ। यसैगरी, कर्णाली र सुदूरपश्चिम प्रदेशका पहाडी भूभागका धेरै स्थानहरूमा तथा कोशी, बागमती, गण्डकी र लुम्बिनी प्रदेशका पहाडी भूभागका केही स्थानहरूमा मेघगर्जन र चट्याङ्गसहित मध्यम किसिमको वर्षा हुने अनुमान गरिएको छ।
यसैक्रममा, लुम्बिनी र सुदूरपश्चिम प्रदेशका तराई भूभागका केही स्थानमा तथा मधेस प्रदेश, कोशी, बागमती र गण्डकी प्रदेशका तराई भूभागका एक–दुई स्थानमा पनि मध्यम वर्षाको सम्भावना रहेको छ। विशेष गरी आज कर्णाली प्रदेशको पहाडी भूभाग तथा लुम्बिनी र सुदूरपश्चिम प्रदेशका पहाडी तथा तराई भूभागका एक–दुई स्थानमा भारी वर्षाको सम्भावना रहेको छ।
त्यसैले यी क्षेत्रका बासिन्दाहरूलाई विशेष सावधानी अपनाउन मौसमविद्हरूले आग्रह गरेका छन्। आज राति पनि मनसुनी प्रभावको असर कायमै रहने देखिएको छ। रातिको समयमा देशको हिमाली र पहाडी भूभागमा साधारणतया बादल लाग्नेछ भने तराई भूभागमा आंशिक बदली रहनेछ।
रातीको समयमा देशको हिमाली र पहाडी भूभागका थोरै स्थानहरूमा मध्यम वर्षाको सम्भावना रहेको छ भने तराई भूभागका एक–दुई स्थानमा समेत मध्यम किसिमको वर्षा हुन सक्नेछ। देशका विभिन्न भूभागमा विशेषगरी कर्णाली, लुम्बिनी र सुदूरपश्चिम प्रदेशका पहाडी तथा तराई क्षेत्रमा भारी वर्षाको सम्भावना रहेकाले नदीनालामा पानीको सतह बढ्न सक्ने, पहिरो जान सक्ने तथा यातायात क्षेत्र प्रभावित हुन सक्ने सम्भावना रहेको छ ।
भारी वर्षाको सम्भावना भएका क्षेत्रका बासिन्दाहरू, नदी किनारमा बस्नेहरू तथा यात्रा गर्ने यात्रुहरूलाई आवश्यक सतर्कता अपनाउन सम्बन्धित निकायले अनुरोध गरेको छ। साथै, स्थानीय प्रशासन र मौसम पूर्वानुमान महाशाखाबाट जारी हुने सूचनाहरू नियमित रूपमा सुन्न र सुरक्षित स्थानमा रहन सबैमा सचेत गराइएको छ।
अविरल र भारी वर्षाका कारण देशका साना तथा ठुला नदी–नाला, खोलाहरूमा पानीको बहाव अचानक तीव्र रूपमा बढ्न सक्ने र यसबाट तटीय क्षेत्रहरूमा बाढी आउने, पहाडी भूभागहरूमा पहिरो तथा भूक्षय जाने र सहरी क्षेत्रहरूमा डुबानको समस्या सिर्जना हुन सक्ने प्रबल जोखिम रहेको छ।
प्राकृतिक विपद्को यो उच्च जोखिमलाई मध्यनजर गर्दै जोखिमयुक्त क्षेत्रमा बसोबास गर्नुहुने सम्पूर्ण आम नागरिकहरूलाई उच्च सतर्कता अपनाउन, अनावश्यक यात्रा नगर्न र स्थानीय प्रशासन तथा मौसम विभागका सूचनाहरूको नियमित पालना गर्न आग्रह गरिएको छ।
