विराटनगर,असोज २७
लायन्स क्लब विराटनगर एक्टिभले महिला जागृति तथा बृद्धाश्रमलाई ३ कोठाको भवन निर्माणगरि हस्तान्तरण गरेको छ ।पुष्पलालचोकस्थित बृद्धाश्रम परिसरमा एक कार्यक्रमको आयोजनागरि निर्मित भवन बृद्धाश्रमलाई हस्तान्तरण गरिएको छ ।
कार्यक्रमकाबीच लायन्स क्लबका पुर्व अन्तरराष्ट्रिय निर्देशक संजय खेतानले भवनको साँचो आश्रम संचालिका भुवनेश्वरी आचार्यलाई हस्तान्तरण गरेका थिए ।
आश्रम परिसरमा रहेको भवनको माथिल्लो तल्लामा १२ लाख ५४ हजारको लागतमा ३ कोठे फ्ल्याट निर्माण गरिएको भवन निर्माण संयोजक एवम लायन्स क्लब एक्टिभका संस्थापक अध्यक्ष रेबतबहादुर कार्कीले बताए ।
उनले क्लबले भवन निर्माण गर्नुका साथै तीन कोठामा आवश्यक पर्ने सम्पूर्ण फर्निचर र इलेक्ट्रीकल सामाग्रि समेत जडान गरिदिएको जानकारी दिए ।
हालसम्म भवन,हल र भान्सा कोठा समेत गरेर आश्रम परिसरमा ३५ लाख रकमको लगानी गरिसकिएको एक्टिभका अध्यक्ष गोपाल कार्कीले बताए ।
बृद्धाश्रमको चारैतर्फ पर्खाल निर्माण गर्नकालागि थप २० लाख आवश्यक पर्ने भएकाले सहयोगी दाताहरुसंग सहयोगको अपिल समेत गरिएको छ ।
