विराटनगर,कात्तिक ७
कानुन, न्याय तथा आन्तरिक मामिला मन्त्री भानुभक्त ढकालले अब आउने वजेटबाट जेष्ठ नागरिकले पाउने सामाजिक सुरक्षा भत्ता बढेर आउने बताएका छन् ।
मोरङको सुन्दरहरैंचामा आज आयोजित अन्तरक्रिया तथा ब्याज अनुदान फिर्ता कार्यक्रममा बोल्दै मन्त्री ढकालले आगामी बजेटमा सुरक्षा भत्ता वृद्धि गरिने बताए ।
उनले सरकारले आफ्नो काम नियमित रुपमा गरिरहेको अहिले अब चाँडै त्यसको परिणाम देखिने दाबी गरे । ढकालले वर्तमान सरकार कम्युनिष्टको सरकार भएकाले निर्वाचनताका जनतासामू राखेका वाचाहरु कहिल्यै नभुल्नेसमेत बताए ।
प्रदेशसभा सदस्य राजकुमार ओझाले सहकारीमा आम जनताको पहँुच हुनुपर्नेमा जोड दिए । युवा तथा साना व्यवसायी स्वरोजगार कोषका कार्यकारी उपाध्यक्ष डा. प्रेम दङ्गालले सुरुमा कानुनी जटिलताका कारण केही समस्या देखिए पनि पछिल्लो समयमा ती जटिलताहरु हट्दै आएको उल्लेख गरे ।
कार्यक्रममा मोरङका विभिन्न ८ वटा सहकारीमार्फत ४५ लाख बराबरको ब्याज फिर्ता गरिएको आयोजकले जनाएको छ ।
