विराटनगर, कात्तिक ९
सडक र नाला निर्माणमा ठेकेदारले लापरबाही गरेको भन्दै विराटनगर –६ का स्थानीय रुष्ट बनेका छन् । ठेकेदारले सडक र नाला निर्माणमा आफु खुसी काम गरेको र निर्माणमा गुणस्तरहीन सामाग्री प्रयोग गरेको भन्दै विराटनगर –६ शुक्रपथका स्थानीय रुष्ट बनेका हुन् ।
विराटनगर– ६ का स्थानीय शेख बर्कतले भने–“ठेकेदारले नाला,कल्र्भट मापदण्ड विपरीत बनाईरहेको छ । कतै साँघुरो र कतै फराकिलो छ” उनले भने“ निर्माणमा गुणस्तरीय इट्टा प्रयोग गर्नुपर्ने भएपनि २ नम्बरको इट्टा प्रयोग भएको छ ।”
ठेकेदारले नाला निर्माण गर्दा कतै राम्रो र कतै नराम्रो निमार्ण सामाग्री प्रयोग गरेको उनले बताए । त्यस्तै स्थानीय रवि रायले पनि ठेकेदारले गुणस्तरहीन काम गरेको र पटक पटक ठेकेदार जीवन गुप्तालाई भन्दा पनि यसको जवाफ नदिई हिँड्ने गरेको बताए । “अहिलको नाला कतै ठूलो त कतै सानो बनाईएको छ , काम पनि दुई नम्बरी छ ।”उनले भने “यसमा ठेकेदारले चरम लापरबाही गरेको छ ।”
स्थानीयले नालाको ढलान गर्दा पनि पानी भरिएर हिलाम्मै भएको अवस्थामा गर्ने गरेको बताएका छन । सडक नालाको निमार्णमा कसैलाई काखा र कसैलाई पाखा गरेको स्थानीयहरुको गुनासो छ ।
उनीहरुले यो काम तुरुन्त सच्याउनुपर्ने र ठेकेदारलाई कारबाही हुनुपर्ने बताएका छन । ठेकेदारले काम नसच्याए काम अघि बढाउन नदिने भन्दै स्थानीयले काम समेत रोकिदिएका छन् ।
विराटनगर महानगरपालिका निमार्ण भइरहेको सडक नालामा गुणस्तरहीन र मापदण्ड विपरीत काम हुने गरेको पटक पटक भेटिएपनि यसमा पर्याप्त अनुगमन नभएको स्थानीयको गुनासो छ । विराटनगर भित्रको सडक र नाला निर्माणको लागि एसियाली विकास बैंक (एडिबी)ले करीब ६ अर्ब सहयोग गरेको छ ।
