काठमाडौं,कात्तिक १५
नेपाल साफ यू–१५ फुटबल च्याम्पियनसिपको सेमिफाइनलबाटै बाहिरिएको छ । अघिल्लो संस्करणको उपविजेता रहेको नेपाल बिहिबार पाकिस्तानसँग ४–० ले पराजित हुदै प्रतियोगिताको सेमिफाइनलबाटै बाहिरिएको हो ।
ललितपुरको सातदोबाटोस्थित एन्फा कम्प्लेक्सको कृतिम मैदानमा बिहिबार भएको खेलमा नेपालले बलियो पाकिस्तानलाई पहिलो हाफमा गोलरहित बराबरीमा रोकेपनि दोस्रो हाफमा रोक्न सकेन ।
पाकिस्तानले ५४औं मिनेटमा आत्मघाती गोलबाट खेलमा अग्रता बनाएको थियो । पाकिस्तानका खेलाडीले क्रस गरेको बललाई जान लिम्बुले क्लियर गर्न खोज्दा बलले आफ्नै पोष्टको दिशा लिएको थियो । ५९औं मिनेटमा जान लिम्बुले पाकिस्तानी खेलाडीलाई डि–बक्समा लडाएपछि पाकिस्तान मोहम्मद उल्लाहले गोल गर्दै पाकिस्तानलाई २–० को अग्रता दिलाएका थिए ।
६९औं मिनेटमा प्राप्त अर्को पेनाल्टीमा मोहम्मदले गोल गर्दै पाकिस्तानलाई ३–० को सहज स्थितिमा पु¥याएका थिए । मुदस्सर नजरले गोल गर्दै पाकिस्तानलाई ४–० को सहज जित दिलाए ।अब फाईनलमा बंगलादेश र पाकिस्तान भिँड्नेछन् ।
आजै भएको पहिलो सेमिफाईनलमा भारतलाई पेनाल्टी सुटआउटमा ४–२ ले पराजित गर्दै बंगलादेशले फाइनलको यात्रा तय गरेको थियो । नेपालले शनिबार तेस्रो स्थानको लागि भारतसँग खेल्नेछ ।
