[अपडेट ]लामो प्रयासपछि इटहरीको व्यापारिक भवनको आगो नियन्त्रण

इटहरी , कार्तिक २१
इटहरी उपमहानगरपालिकामा रहेको एक व्यापारिक भवनमा लागेको आगो नियन्त्रणमा आएको छ । दिउँसो सवा १ बजे लागेकोे आगो करीब ४ घन्टापछि नियन्त्रणमा आएको हो ।

इटहरी बजारको उत्तरमा रहेको धरान लाइनस्थित सप्तकोशी डिजिटल फोटो स्टुडियोको माथिल्ले तलाको सप्तकोशी इलेक्ट्रोनिक्सबाट आज आगलागी शुरु भएको थियो ।रेखा पराजुलीको चारतले घरबाट शुरु भएको आगलागीले सँगै जोडिएको गणेश लुइँटेलको घरमा पनि क्षति गरेको छ ।

आगोले दोस्रो र तेस्रो तलामा रहेका टिभी, फ्रिज र इलोक्टिनिक आइटमको स्टक सामान जलेर नष्ट भएका छन् । प्रारम्भिक अनुमान अनुसार दुई करोड बराबरको क्षति पुगेको छ ।

रेखाको घरको पहिलो तलाको अगाडिका कोठामा टिभी, फ्रिजसँगै इलोक्टिनिक सामानको विक्री केन्द्र रहेकोमा दोस्रो र तेस्रो तलामा स्टक सामान राखिएको थियो ।

आगलागी नियन्त्रण गर्नका लागि इटहरीसहित दुहवी, धरान, इनरुवा, धरान, मोरङको सुन्दरहरैँचा र विराटनगरको वारुणयन्त्रसहित सेना र प्रहरी टोली परिचालन भएको थियो । आगलागीको कारण खुल्न नसके पनि विद्युत सर्ट भएर आगलागी भएको अनुमान गरिएको छ ।