विराटनगर,मंसिर ४
मोरङ व्यापार संघ र उद्योग संगठन मोरङले नेपालका लागि वंगलादेशका राजदूत मास्फे विन्तसँग नेपालमा उत्पादित सामाग्रीहरुलाई भन्सारको दरमा सहुलियत दिन माग गरेका छन् ।
मोरङ व्यापार संघ र उद्योग संगठन मोरङले नेपालका लागि वंगलादेशका राजदूत विन्तसँग भेटवार्ता गरी नेपालमा उत्पादित सामाग्रीहरुलाई भन्सारको सहुलियत दिन माग गरेका हुन् ।
वंगलादेशमा नेपालबाट जाने सामाग्रीमा १ सय २० प्रतिशत भन्सार दर भएकाले यसलाई घटाउन राजदुत मास्फेको ध्यानाकर्षण गराइएको मोरङ व्यापार संघका अध्यक्ष पवनकुमार सारडाले बताए ।
उनले भने भन्सार महशुलकै कारण धेरै उत्पादनहरु बंगलादेश निर्यात हुन सकिरहेका छैनन ।यदि बंगलादेश सरकारले भन्सार दरमा केही सहुलियत दिन सके यहाँका उद्योगहरुले गति लिन सक्थे ।
यस्तै उद्योग संगठन मोरङका सुयश प्याकुरेलले भन्सार सहुलियत हुने हो भने जुस, बिस्कुट, चाउचाउ लगायतका स्वदेशी उत्पादन सामाग्रीहरु निर्यात गर्न सकिने बताए ।
अहिले नेपालबाट जुट, अम्लिसो , अलैची लगायतका सामाग्रीहरु बंगलादेश निर्यात हुदै आएका छन् । तर बंगलादेशबाट अन्य धेरै नेपाली उत्पादनहरुको माग हुने गरेपनि भन्सार महशुलका कारण निर्यात हुन सकिरहेको छैन ।
पूर्वमा उत्पादित चिया,कफी र फलफुल उल्लेखनीय रूपमा वंगलादेश निर्यातको गर्न सकिने भएकोले यसलाई व्यवस्थित गर्न नेपाल सरकारले पहल गर्नुपर्नेमा यहाँका उद्योगीहरुले लामो समयदेखि जोड दिदै आएका छन् ।
