विराटनगर,मंसिर २१
विराटनगरमा दोभाषेहरुकालागि नेपाली सांकेतिक भाषा सम्बन्धि दुइदिने प्रशिक्षण तथा क्षमता अभिबृद्धि कार्यक्रम सुरु भएको छ । राष्ट्रिय सांकेतिक भाषा दोभाषे संघ नेपाल,कोशी बहिरा संघ विराटनगर र विराटनगर महानगरपालिकाको सहकार्यमा प्रशिक्षण सुरु भएको हो ।
स्थानीय अतिथि सदनमा शुरु भएको प्रशिक्षणको विराटनगर महानगरपालिकाका प्रमुख भीम पराजुलीले उद्घाटन गरे । प्रशिक्षणमा सात प्रदेशका ३८ जिल्लाका ७६ जना सहभागि रहेको राष्ट्रिय सांकेतिक भाषा दोभाषे संघका महासचिव बिजय तमांगले जानकारी दिए ।
कार्यक्रमका सहभागिलाई सांकेतिक भाषा विशेषज्ञ समेत रहनुभएका अमेरिकन नागरीक माइक मोर्गन र दोभाषे संघका अध्यक्ष शिलु शर्मा लगायतले प्रशिक्षण दिने जनाइएको छ ।
सांकेतिक भाषाको शब्दकोषमा पछिल्लो समयमा थप गरिएको २५ सय नयां शब्दको प्रयोगको बिषयमा सहभागिलाई प्रशिक्षण दिइने आयोजक संस्थाले जनाएको छ ।
यसअघि सांकेतिक भाषामा २२ सय शब्द प्रयोग हुंदै आएकोमा हाल २५ सय शब्द थपगरि ४७ सय शब्दको शब्दकोष प्रकाशन गरिएको जनाइएको छ ।
