काठमाडौं,मंसिर २१
नेपाली घरेलु क्रिकेटमा सर्वाधिक लोकप्रिय प्रतियोगिता टिभीएस एभरेष्ट प्रिपियर लिग (ईपीएल) को तेस्रो संस्करण शनिबार देखी काठमाडौँको टीयू क्रिकेट मैदानमा सुरु हुँदैछ ।
प्रतियोगितामा विभिन्न ६ शहरका फ्रेन्चाइज टोलीले सहभागिता जनाएका छन् । १९ खेल हुने प्रतियोगिता १५ दिनसम्म चल्नेछ । यस पटक दक्षिण अफ्रिकी ओपनर ब्याट्सम्यान रिचर्ड लेभी, नेदरल्यान्ड्सका रायन टेन डोस्काटे, स्कटल्यान्डका काइल कोट्जर र आइरिसद्वय पल स्टरलिङ र केभिन ओ ब्राएनसम्मका स्टार क्रिकेटर ईपीएल खेल्दै छन् । त्यस्तै विदेशी कमेन्टर, वेलायती चियरलिडर्ससँगै दर्शकलाई मनोरञ्जन प्रदान गर्न विभिन्न कार्यक्रम आयोजना गरिनेछ ।
दर्शकहरुका लागि लक्कि ड्र मार्फत हरेक दिन विभिन्न उपहार साथै छक्काको बल एक हातले क्याच लिए रु ५० हजार पाउने छन् । त्यसैले पनि ईपीएल विशेष हुने छ । ईपीएलको उपाधि राशी भने घोषणा गरिएको छैन । आयोजकले केहि दिनमा सार्वजनिक गर्ने बताएको छ ।
ईपीएलमा काठमाडौं किंग्स इलेभेन, ललितपुर प्याट्रीयट्स, विराटनगर वारीयर्स, भैरहवा ग्ल्याडीयटर्स, चितवन टाइगर्स र पोखरा राइनोज गरि ६ टिम रहेका छन् । राउण्ड रोविनका आधरमा हुने प्रतियोगितामा शीर्ष चार टोलीले प्लेअफमा स्थान बनाउने छन् । शनिबार उद्धघाटन खेलमा कप्तान पारस खड्का रहेको विराटनगर वारियर्सले ज्ञानेन्द्र मल्लले सम्हालिरहेका ललितपुर प्याट्रियट्सको सामना गर्ने छ । खेल दिउँसो १ वजेपछि टियू मैदानमा सुरु हुने छ ।
यस्ता छन् ईपीएल खेल्ने टीम र खेलाडी :
विराटनगर वारीयर्स
वारियर्सको कप्तानी पारस खड्काले गर्ने छन् । विराटनगर गर्त वर्षको विजेता टोली हो । फाइनलमा भैरवाहलाई १ रनले हराउँदै उपाधि जितेको थियो । यस पटक पनि विराटनगरको पुख्य लक्ष्य उपाधि जित्ने नै रहेको छ ।
विराटनगरमा हङकङका पुर्व कप्तान तथा ब्याटिङ अलराउण्डर बावर हायत, नेदरल्यान्डका पाउल भेन मिकरेन, पूर्व दक्षिण अफ्रिकी तथा हाल डच खेलाडी रोलोफ भेन डर मर्वलगायतका विदेशी खेलाडी छन् । त्यस्तै आशिफ शेख, अनिलकुमार शाह, करण केसी, वसन्त रेग्मी विराटनगरका मुख्य हतियार हुन् ।
भैरहवा ग्ल्याडीयटर्स
शरद भेषवाकर भैरहवा ग्ल्याडीयटर्सका कप्तान हुन् । घरेलु लिगमा सर्वाधिक लक्की मानिने भेषावकर गतवर्ष ईपीएलको उपाधि चुम्न १ रनले चुकेका थिए । यस वर्ष भैरवाहले विदेशी खेलाडीको रुपमा नेदरल्यान्डका ब्याटिङ अलराउण्डर रायन टेन डोस्काटे, यूईका तीव्र गतिका बलर मोहम्मद नाविद र भारतीय ब्याट्सम्यान रवि इन्दर सिंहलाई टोलीमा भित्र्याएको छ । डोस्काटे एसोसिएट स्टार खेलाडीको रुपमा चिनिन्छन् । त्यस्तै भैरहवामा युवा खेलाडी हरिशंकर शाह, आरिफ शेख, रोहित कुमार पौडेल, प्रदीप ऐरी, भुवन कार्की, कृष्ण कार्की, भुपेन्द्र थापा जस्ता खेलाडी छन् ।
काठमाडौं किंग्स इलेभेन
यस वर्ष इलेभेनको कप्तानी सोमपाल कामीले गर्ने छन् । विदेशी खेलाडीको रुपमा आयरल्यान्डका केभिन ओ ब्रायन, यूएइका कप्तान रोहन मुस्तफा र आईपीएल खेली सकेका भारतीय प्रदीप साहू छन् । प्रदीप जिम्बावेका सिकन्दर राजाको स्थानमा आएका हुन् । त्यस्तै काठमाडौमा अमित श्रेष्ठ, सागर पुन, नरेश बुढाएर, सिद्धान्त लोहनी, राजु रिजाल, अमरसिंह राउटेला, बिक्रम भुषाललगायत रहेका छन् ।
पोखरा राइनोज
पोखराको कप्तानी स्कटल्यान्डका काइल कोट्जरले गर्ने छन् । दक्षिण अफ्रिकाका ओपनर रिचर्ड लेभी पनि पोखराबाट खेल्ने छन् । ईपीएलमा यस वर्ष लेभी सर्वाधिक ठूला नाम अर्थात उच्च स्तरका खेलाडी हुन् । पोखरामा लेभीसँगै इङ्ल्यान्डका अलराउण्डर पाउल कोग्लिन र हङकङका सन्नी भिमसारिया छन् । त्यस्तै अस्ट्रेलियन कोच नाथन डोडले पोखराको प्रमुख प्रशिक्षक सम्हाल्ने छन् । शक्ति गौचन, सुनिल धमला, विनोद भण्डारी, सौरभ खनाल, सुसन भारी, विक्रम शोब, राजेश पुलामी मगर पोखराका मुख्य खेलाडी हुन् ।
चितवन टाइगर्स
चितवन टाइगर्सको कप्तानी पुथु बास्कोटाले सम्हाल्ने छन् । विदेशी खेलाडीको रुपमा चितवनले इंग्ल्यान्डका जोन सिम्पसन, जर्ज स्कट र टेस्ट राष्ट्र आयरल्यान्डका विष्फोटक ओपनर ब्याट्सम्यान पाउल स्टर्लिङलाई भित्र्याएको छ । दिपेन्द्र सिंह ऐरी, दिलिप नाथ, भिम सार्की, ललितसिंह भण्डारी, साहव आलम, कमलसिंह ऐरी हाल चितवनमा रहेका छन् ।
ललितपुर प्याट्रियट्स
ललितपुरको कप्तानी राष्ट्रिय टोलीका उपकप्तान ज्ञानेन्द्र मल्लले गर्ने छन् । ललितपुरबाट भारतीय सन्नी पटेल, जय किशन कोल्सावाला र गौरभ तोमर विदेशी खेलाडीका रुपमा रहेका छन् । त्यस्तै सन्दीप लामिछाने, पवन सराफ, ललितनारायण राजवंशी, कुशल भुर्तेल, राशिद खान, सन्दीप जोरा, सोनु तामाङ ललितपुरका मुख्य हतियार हुन् ।(हाम्रो खेलकुदबाट)