हिमालयन हाइड्रो एक्स्पो आयोजना हुँदै

काठमाडौँ, ११ पुस  ः जलविद्युत् क्षेत्रमा लगानी, उत्पादन तथा प्रविधिका बारेमा जानकारी दिने उद्देश्यले स्वतन्त्र ऊर्जा उत्पादकको संस्था(इपान)ले यही पुस २१ गतेदेखि २३ गतेसम्म ‘हिमालयन हाइड्रो एक्स्पो २०१८’ को आयोजना गर्ने भएको छ ।

जलविद्युत्को विकास र विस्तारमा सहयोग पुग्ने गरी उक्त प्रदर्शनीको आयोजना गर्न लागिएको यहाँ आज आयोजित पत्रकार सम्मेलनमा जानकारी दिइयो ।

जलविद्युत् क्षेत्रमा पछिल्लो दिनमा विकास भएका नयाँनयाँ प्रविधि तथा ज्ञानका बारेमा समेत जानकारी दिने लक्ष्यका साथ प्रदर्शनीको आयोजना गरिएको इपानका अध्यक्ष शैलेन्द्र गुरागाईंले जानकारी दिनुभयो ।

प्रदर्शनीमा जलविद्युत् उत्पादनकर्ता, सामान आयात गर्ने संस्था वा निकाय, परामर्शदाता, बीमा कम्पनी, लगानीकर्ता तथा बैंक र वित्तीय संस्थाका प्रतिनिधिको सहभागिता रहनेछ । उक्त प्रदर्शनीमा नेपाल, चीन, भारत, नर्वे, दक्षिण कोरिया, अस्ट्रिया, बुल्गेरिया, चेक रिपब्लिक, इटली, स्वीडेन, बेलायत, ब्राजिललगायत मुलुकका कम्पनी तथा सरोकारवालाको सहभागिता रहनेछ ।

दर्जनौँ विदेशी कम्पनीको सहभागिता रहने भएकाले नेपालको जलविद्युत्को बजार विस्तारका साथै अनुभवको आदानप्रदानसमेत हुने इपानका उपाध्यक्ष कुमार पाण्डे बताउनुहुन्छ ।

नेपाल विद्युत् प्राधिकरण र निजी क्षेत्रबीच तीन हजार ५०० मेगावाट क्षमताका आयोजनाबीच विद्युत् खरिद सम्झौता भइसकेको छ । ती आयोजना हाल निर्माणको चरणमा छन् । यस्तै सरकारी लगानीका करिब पाँच हजार मेगावाट क्षमताका आयोजना निर्माणका क्रममा छन् ।

स्वदेशी लगानीमा विद्युत् उत्पादनलाई गति दिन जरुरी रहेको भन्दै इपानले सरकारसँग मिलेर प्रदर्शनीको आयोजना गरेको इपानका पूर्वअध्यक्ष खड्गबहादुर विष्ट बताउनुहुन्छ । प्रदर्शनीलाई राष्ट्रिय योजना आयोग, ऊर्जा मन्त्रालय र जनसंख्या तथा वातावरण मन्त्रालयको संरक्षकत्व रहेको छ । प्राधिकरण, नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, नेपाल बैंकर्स एसोसिएसन र युथ कम्युनिटी फर कन्ट्राक्टर्सले सहयोग गरेको छ । तीन दीनसम्म चल्ने प्रदर्शनीको ५० हजार बढी नागरिकले अवलोकन गर्ने अनुमान गरिएको छ । नेपालमा उत्पादन भएको विद्युत् भारत, चीन र बंगलादेशसम्म व्यापार गर्ने लक्ष्य राखिएको सन्दर्भमा बजारको खोजी तथा विस्तारलाई केन्द्रमा राखिएको आयोजकले जनाएको छ ।

प्रविधिमा आएका विकाससँगै जलविद्युत् आयोजनाको महत्वपूर्ण कार्यका रुपमा लिइने सुरुङ निर्माणमा टनेल बोरिङ मेसिन(टिबिएम)को प्रयोगका सम्बन्म्धमा समेत प्रदर्शनीमा विशेष जानकारी दिइने अध्यक्ष गुरागार्इंले बताउनुभयो । नेपालमा हाल भेरी बबई डाइभर्सन आयोजनामा टिबिएम मेसिनको प्रयोग भएको छ । एक महिनामा उक्त मेसिनले एक किलोमिटर सुरुङ खनिसकेको छ ।

उक्त आयोजनाबाट बर्दियाको करिब ५० हेक्टर जमिनमा सिँचाइ सुविधा उपलब्ध हुने र ४८ मेगावाट विद्युत् उत्पादन गर्ने लक्ष्य छ । लामा लामा सुरुङ निर्माणका लागि उक्त टिबिएम मेसिन प्रयोग उपयुक्त हुने देखिन्छ । इपानका केही सदस्यले समेत उक्त मेसिन ल्याउने तयारी गरिरहेका छन् ।
(रासस)