काठमाडौं,मंसिर २५
सरकारले १० वर्षमा १५ हजार मेगावाट विद्युत उत्पादन लक्ष्य पूरा गर्न ‘टेक अर पे’ (लिउ या तिर) प्रावधानको विद्युत खरिद बिक्री सम्झौता (पिपिए) खुलाएको छ । ऊर्जा जलस्रोत तथा सिँचाइ मन्त्रालयले स्वयतपत्रको लक्ष्य कार्यान्वयन गर्न टेक अर पे प्रावधानको पिपिए खुलाउने निर्णय गरेको हो ।
‘आगामी दशक ऊर्जा दशक’ नारा दिएर ल्याइएको स्वयतपत्रको लक्ष्य कार्यान्वयन गर्न नदी प्रवाही आयोजनाको सीमा ५ हजार २ सय ५० मेगावाट रहने गरी टेक अर पे पिपिए गरिनेछ । मन्त्रालयको निर्णयसँगै यसअघि नेपाल विद्युत प्राधिकरणसँग टेक एण्ड पे मा भएको पिपिए पनि टेक अर पे मा रुपान्तरण हुनेछ ।
यस्तै, ४ हजार ५ सय मेगावाटका अर्धजलासय आयोजनाको टेक अर पे पिपिए गर्न मन्त्रालयले प्राधिकरणलाई निर्देशन दिएको छ । प्राधिकरणको तथ्याङ्क अनुसार अहिलेसम्ममा ७ सय २० अर्धजलाशय आयोजनाको मात्रै पिपिए भएको छ । टेक अर पे प्रावधानमा पिपिए गर्दा आर्थिक भार थपिएमा त्यसको सोध भर्ना सरकारसँग माग गर्ने स्वीकृति मन्त्रालयले प्राधिकरणलाई प्रदान गरेको छ ।
टेक अर पे प्रावधानको पिपिए लागु भएपछि निजी प्रवर्द्धकले १० वर्षमा १५ हजारको सीमा पूरा गर्न सहज हुने मन्त्रालयको भनाइ छ । टेक अर पे खुलेपछि पिपिए गर्न लाइनमा बसेका र पिपिए भइसकेका दर्जनौं आयोजनाले राहत पाउने भएका छन् ।
प्राधिकरणले अहिलेसम्म करिब ३ हजार ६ सय मेगावाट नदी प्रवाही आयोजनाको पिपिए गरिसकेको छ । ऊर्जा दशक अवधिमा विद्युत उत्पादनको सीमा १५ हजार पुर्याएर १० हजार मेगावाट आन्तरिक खपत गर्ने तथा ५ हजार भारत बंगालादेशलगायत मुलुकमा निर्यात गर्ने सरकारको लक्ष्य छ ।(उर्जा खबरबाट)
