एजेन्सी, पुस २
स्पेनिस ला लिगा फुटबल अन्तरगत आईतबार राती भएको खेलमा कप्तान लियोनेल मेस्सीको ह्याट्रिकमा क्याटलान क्लब बार्सिलोनाले लेभान्टेमाथि शानदार जित निकालेको छ ।
लेभान्टेका घरेलु मैदानमा भएको खेलमा बार्सिलोनाले १० खेलाडीमा समेटिएको लेभान्टेलाई ५–० को फराकिलो गोल अन्तरले पराजित गरेको हो । मेस्सीले ह्याट्रिक पुरा गर्दा लुइस स्वारेज र जेरार्ड पिकेले समान १ गोल गरे । ला लिगामा मेस्सीको यो ३१ औं ह्याट्रिक हो ।
बार्सिलोनाले खेलको ३५औं मिनेटमा लुइस स्वारेजको गोलबाट अग्रता बनाएको थियो । ४३औं मिनेटमा मेस्सीले गोल गरेपछि पहिलो हाफमा बार्सिलोना २–० ले अघि बढेको थियो ।
दोस्रो हाफमा बार्सिलोनाले थप तीन गोल गर्न सफल भयो । ४७औं मिनेटमा मेस्सीले व्यतिगत दोस्रो गोल गर्दै बार्सिलोनालाई ३–० को आरामदायी स्थितिमा ल्याए । ६०औं मिनेटमा मेस्सीले ह्याट्रिक पुरा गर्दा बार्सिलोना खेलमा ४–० को बलियो पकड बनायो ।
७६औं मिनेटमा लेभान्टेका इरिक काबाकाले रातो कार्ड पाउदा घरेलु टोली १० खेलाडीमा समेटियो । ८८औं मिनेटमा डिफेन्डर जेरार्ड पिकेले गोल गर्दै बार्सिलोनालाई ५–० को फराकिलो जित दिलाए ।
जितपछि बार्सिलोनाले दोस्रो स्थानको सेभिल्ला र एट्लेटिको मड्रिडसँग स्पष्ट ३ अंकको अग्रता बनाएको छ । बार्सिलोनाको १६ खेलबाट ३४ अंक पुगेको छ ।
सेभिल्ला र एट्लेटिकोको समान खेलबाटै ३१ अंक रहँदा रियल मड्रिड २९ अंक जोडेर चौथो स्थानमा रहेको छ । लेभोन्टे २२ अंक जोडेर आठौं स्थानमा छ ।
आइतबार राति नै भएको खेलमा सेभिल्लाले जिरोनालाई २–० ले पराजित गर्दै लिगको दोस्रो स्थानमा उक्लन सफल भएको थियो । सेभिल्लाको जितमा इभर बनेगा र पाब्लो सारावियाले गोल गरे ।
