विराटनगर, पुस १६
लामो समयदेखि सञ्चालक समितिको विवादमा रुमलिएको विराटनगर जुटमिल्स लिमिटेडको विवाद अन्तत टुगिंएको छ । उच्च अदालत विराटनगरले अध्यक्ष वसन्त वन विरुद्धको रिट खारेज गरिदिएपछि जुटमिल्सका अध्यक्षबीचको विवाद टुगिंएको हो ।
अध्यक्ष वन अवैधानिक अध्यक्ष रहेको भन्दै उनलाई हटाउन भनी राजेन्द्र कार्कीले दायर गरेको रिट उच्च अदालतका न्यायधिस नागेन्द्र लाभ कर्ण र साधुराम सापकोटाको इजलासले खारेज गरिदिएपछि अध्यक्षको विवाद टुगिंएको हो ।
अदालतको फैसलापछि वनले आफनो पक्षमा फैसला भएको भन्दै अब मिलको नेतृत्व सन्चालन गर्ने बताए । अदालतले मेराविरुद्धमा दायर भएको रिट खारेज गरिदिएको छ उनले भने अब मिलको नेतृत्व सम्हालेर यसलाई पूर्ण क्षमतामा संचालन गराउनेछुु ।
उच्च अदालत विराटनगरका रजिष्ट्रार नारायणप्रसाद रेग्मीका अनुशार अब वनलाई जुटमिल्सको अध्यक्षको रुपमा काम गर्न कानूनी बाटो खुलेको छ ।
रेग्मीले वनविरुद्धको रिट खारेज भएको बताए ।यसअघि अध्यक्ष बसन्त वनले गरेको कुनै पनि निर्णय कार्यान्वयन नगर्न उच्च अदालत विराटनगरले अन्तरिम आदेश गरेको थियो । उच्च अदालतका न्यायाधिश उमेशराज पौड्यालको एकल इजलाशले गरेको सो अन्तरिम आदेश उल्टाउदै रिट खारेज गरिदिएको हो ।
यसअघि विराटनगर जुटमिल्समा वसन्त वन र मुकुन्दप्रसाद नेपालले आ–आफ्नो समूहको आधिकारिता भएको दावी गर्दे आएका थिए ।
