विराटनगर : १ नम्बर प्रदेशको राजधानीको विषयलाई लिएर प्रदेश सांसद केदार कार्कीले जिल्ला समन्वय समिति मोरङका प्रमुख नरेश पोखरेललाई सार्वजनिक छेडखानी गरेका छन् । पोखरेल उपस्थित रहेकै कार्यक्रममा उनको नामै लिएर नेपाली काङ्ग्रेस १ नम्बर प्रदेशका प्रमुख सचेतक रहेका कार्कीले छेडखानी गरेका हुन् ।
बुधबार १ नम्बर प्रदेशका धेरैजसो भीआईपी सहभागी विराटनगर बस टर्मिनल उद्घाटन कार्यक्रममा सांसद कार्कीले पोखरेललाई विराटनगर राजधानी बनाउने विषयमा असहयोग गरेको आरोप लगाए ।कार्यक्रममा पहिला बोलेका जिल्ला समन्वय समिति मोरङका प्रमुख नरेश पोखरेलले विराटनगर स्थायी राजधानजी हुने शर्तमा आफुले समन्वय समितिको भवन उपलब्ध गराएको बताएका थिए । राजधानी अन्त सार्ने हो भने अस्थायीका लागि १ मिनेट पनि पुर्वाधार नदिने उनले बताए ।
कार्यक्रममा समन्वय प्रमुख पोखरेल पछि बोलेका सचेतक कार्कीले पुराना प्रसंग कोट्याए । उनले अस्थायी राजधानीका लागि चाहिने पुर्वाधारमा जिल्लाका पिता मानिने जिल्ला समन्वय समितिका प्रमुखले असहयोग गरेको आरोप लगाए । ‘हामीले हात जोड्यौँ, खुट्टा समायौँ, तर उहाँ(पोखरेल)ले प्रदेश संसद राख्ने विषयमा अनेक टाँग लगाउनुभयो’ कार्कीले भने ‘यहीँ घर भएका समन्वय प्रमुख क्वाटरमा बस्नुहुन्छ, तर धरान घर भएका सभामुख र इटहरी आवास भएकी उपसभामुखलाई आवास दिन सकेका छैनौँ ।’
कार्कीले आरोप लगाएजस्तो जिल्ला समन्वय समिति मोरङका प्रमुख पोखरेलको विराटनगरमा अहिले घर छैन । विराटनगर–१२ मा आफैँले बनाएको घर बिक्री गरी उनी भाडामा बस्दै आएका थिए ।सार्वजनिक कार्यक्रममा आफ्नो नाम लिएर कार्कीले आरोप लगाइरहँदा समन्वय प्रमुख पोखरेल केहीबेर रिसाएजस्तो गरे । छेउमा रहेका विराटनगर महानगरपालिकाका प्रमुख भीम पराजुलीसँग कुराकानी गरे । पराजुलीसँगै सोफामा रहेका मुख्यमन्त्री शेरधन राईतर्फ पुलुक्क हेरे । त्यसपछि मुसुमुसु हाँसिरहे ।
उनले आफुले यसको उपयुक्त जवाफ दिने बताए । ‘आज पहिल्यै बोलियो, भाइले दोहोरी सुरु गरेको छ, यसको जवाफ त दिनैपर्छ’ पोखरेलले भने ‘अर्को मञ्चमा मेरो पालो हुनेछ ।’, यो समाचार आजको उद्घोष दैनिकमा छापिएको छ ।
