काठमाडौं, माघ २७
सत्तारुढ दल नेपाल कम्युनिष्ट पार्टी (नेकपा) का स्थायी समिति सदस्य देवेन्द्र पौडेलले प्रधानमन्त्री केपी शर्मा ओली र अध्यक्ष पुष्पकमल दाहाल (प्रचण्ड) बीच सहमति भइसकेको बताएका छन् ।
आइतबार राजधानीमा आयोजित पत्रकार सम्मेलनमा भनेजुएला प्रकरणबारे बोल्दै उनले प्रम ओली र प्रचण्डबीच आगामी दिनमा मिलेर जाने तथा कुनै कार्य गर्नुपूर्व सल्लाह गरी निर्णय गर्ने सहमति भएको बताएका हुन् ।
‘यो विषयमा पार्टीको सचिवालयले सार्वजनिक गरेको धारणा नै आधिकारिक हो । यसमा अब अल्झिनुपर्दैन् । उहाँहरुबीच पनि मेलमिलाप भइसकेको छ’, पौडेलले भने, ‘ पार्टी्भित्र अन्तरसंघर्षमा नफस्नेबारे पनि कुरा भएको मैँले पाएको छु।’
नेता पौडेलले भेनेजुएलाका विषयमा पार्टीका अध्यक्ष पुष्पकमल दाहाल प्रचण्डले विज्ञप्ती जारी गरेर कुनै गल्ती नगरेको स्पष्ट पार्दै भने, ‘नेपालस्थित् अमेरिकी राजदुत र पार्टीका अध्यक्ष प्रचण्डबीच हिजो भेटवार्ता भएको थियो । अब यो समस्या हल भइसक्यो । अमेरिकी राजदुतले अमेरिका भ्रमणका लागि निम्तो समेत दिइसक्नु भएको छ ।’
पौडेलले हिजोमात्रै नेकपाका अध्यक्षद्धय केपी शर्मा ओली र प्रचण्डबीच तीन घण्टा लामो भेटवार्ता भएको जनाए । उनले भने,‘ओली र प्रचण्डबीच सबै कुरा मिलिसक्यो । सहमति भैसक्यो । अब यसलाई अनावश्यक रुपमा उचाल्नु हुँदैन ।’
नेता पौडेलले वर्तमान सरकार गठन भएको एक वर्ष पुग्न लागेको सुनाउँदै यो एक वर्षको कार्यकाल हेर्दा सरकार उत्साहजनक नदेखिएको बताए । उनले भने, ‘सरकारले यो अवधिमा केही कामहरु गर्न प्रयत्न गरेको छ । त्यही भएर असफल नै भनेर भन्न मिल्दैन । दुई तिहाईको सरकारबाट जनताको अपेक्षा धेरै थियो । त्यो अनुसार काम नहुनाले आलोचना बढेको हो ।’
