विराटनगर, माघ २९
प्रथम वाईआरसीसी अन्तर कलेज २०-२० क्रिकेट प्रतियोगिताको उपाधी नेहारिका कलेजले हात पारेको छ । विराटनगरको डिग्री क्याम्पसमा भएको फाइनल खेलमा नेहारिकाले इनरुवाको त्रिशक्ति कलेजलाई ५४ रनले पराजित गरेको हो ।
नेहारिकाले दिएको १०६ रनको लक्ष्य पछ्याएको त्रिशक्ति कलेज १४ ओभरमा ५१ रनमा अलआउट भयो । टस जितेर पहिला ब्याटिङ गरेको नेहारिकाका लागि श्रवण यादवले १६ र मेहबुब बाबु इराकीले नट आउट १८ रन बनाए ।
त्रिशक्तिका लागि जितेन्द्र यादवले ४ र सोनु मण्डलले २ विकेट लिए । जवाफी ब्याटिङमा उत्रिएको त्रिशक्तिका लागि सोनु मण्डलले १७ रनको योगदान दिए पनि जितका लागि पर्याप्त भएन । नेहारिकाका मेहबुब बाबु इराकी ४, केशव घिमिरेले ४ र फिरदोस अन्सारीले १ विकेट लिए ।
प्रतियोगितामा नेहारिकाका मेहबुब बाबु इराकी उत्कृष्ट खेलाडी,अर्किड कलेजका दिपक पासवान उत्कृष्ट ब्याट्स म्यान र नेहारिकाका केशव घिमिरे उत्कृष्ट बलर घोषित भएका थिए । उनीहरुलाई कार्यक्रमका प्रमुख अतिथी महेशकुमार साह र प्रतियोगिताका संयोजक मनोज चौधरीले पुरस्कार प्रदान गरेका थिए ।
