इटहरी, फागुन २४
सुनसरीको कोशी गाउँपालिका–८ नेहरुपार्कमा शुक्रवार हायस गाडीको ठक्करबाट मोटरसाईकलमा सवार बावुको मृत्यु भएको छ भने छोरा घाइते भएका छन् । पूर्व–पश्चिम राजमार्गमा पश्चिम तर्फ जाँदै गरेको को ३३ प २०५१ नम्बरको मोटरसाईकललाई बिपरित दिशाबाट आउँदै गरेको बा ५ ख ७११६ नम्बरको हायसले दिउँसो सवा ३ बजे ठक्कर दिएको थियो ।
हायसको ठक्करबाट मोटरसाईकलको पछाडी सवार सप्तरी सप्तकोशी नगरपालिका–३ फत्तेपुर बस्ने ६० वर्षीय अम्मर बहादुर थापा र उनका छोरा मोटरसाईकल चालक ३८ वर्षीय मोहनराज थापा घाइते भएका थिए ।
दुर्घटनामा घाइते दुवै जनालाई उपचारको लागि जिल्ला अस्पताल ईनरुवा पठाईएकोमा गम्भीर घाइते बावुको उपचारको क्रममा दिउँसो ३ : ५५ बजे सोही अस्पतालमा मृत्यु भएको हो भने छोराको अवस्था सामान्य रहेको जिल्ला प्रहरी कार्यालय सुनसरीले जनाएको छ ।
हायस र चालक जिल्ला रामेछाप दुरम्बा गाउँपालिका–७ थापागाउँ बस्ने ४२ वर्षीय राम तामाङलाई प्रहरीको नियन्त्रणमा राखिएको उक्त कार्यालयले जनाएको छ ।
