विराटनगर, चैत ३
उपप्रधान तथा स्वास्थ्यमन्त्री एवं संघीय समाजवादी फोरमका अध्यक्ष उपेन्द्र यादवले आफनो पार्टिले सरकार छाड्ने सम्भावना नरहेको बताएका छन । विराटनगरमा आइतबार संचारकर्मीसंग कुरागर्दै उनले राष्ट्रिय जनता पार्टीसंग शक्ति निर्माणका बिषयमा कुराकानी भएपनि सरकार नछाड्ने उल्लेख गरे ।
उनले राजपासंग शक्ति निमार्णका लागि सकारात्मक कुराकानी भएपनि सरकार छाडने शर्त मान्य नहुने बताए । ‘राजपासँग पार्टीको कार्यगत एकताका विषयलाई लिएर फोरमले सरकार छाड्दैन’ उनले भने–’राजपा आफैं प्रदेश २ को तथा स्थानीय सरकारमा सहभागी रहेको र भोलि पनि सरकारमा सहभागी हुने भएकाले सहमतिका लागि सरकारमा सहभागी हुने वा नहुने कुराको कुनै अर्थ रहदैन ।’
उपप्रधानमन्त्री यादवले शान्ति सुरक्षा खल्बलाउन खोज्ने विप्लव समूहलाई प्रतिबन्ध लगाएर सरकारले आफनो दायित्व पूरा गरेको बताए । ‘जनताको जिउधनको सुरक्षागर्नु सरकारको दायित्व हो’ यादवले भने ‘कानुन विपरित हुने जुुनसुकै काम सरकारले निषेध गर्नेछ ।’
विप्लव माओवादीले हिंसात्मक गतिविधि गरेकाले सरकारले प्रतिवन्ध लगाएको भन्दै यस विषयलाई गलत अर्थमा व्याख्या गर्न नहुने पनि उनले बताए । सिके राउत संग भएको सम्झौतालाई गलत अर्थ लगाउन खोजिएको बताउँदै उनले मुलुक विखण्डन गर्न खोज्ने समूहलाई राजनितिक मुलधारमा ल्याउनु सरकारको सफलता भएको दाबी गरे ।
